Թիվ 8 ընտրատարածքում մեծամասնականով առաջադրված ՀՅԴ թեկնածու Արթուր Եղիազարյանի տան դուռը թակել են ՀՀԿ ներկայացուցիչներն ու առաջարկել ձայնը տալ Հանրապետական թեկնածուին: Այսօր այդ մասին պատմեց ինքը՝ Արթուր Եղիազարյանը՝ Քաղաքական եւ միջազգային հետազոտությունների կենտրոնի կազմակերպած ընտրական գործընթացների թեմայով քննարկմանը: ՀՀԿ-ի անունից հանդես եկող ընտրակաշառք բաժանողները չեն հասցրել իրենց դրամական առաջարկը ներկայացնել, քանի որ, ինչպես նշեց ՀՅԴ թեկնածուն, միամտություն է դրսեւորել ու հենց դռնից է ճանապարհել՝ առանց տեսանկարահանելու:
Aravot.am-ի հարցին, թե Մալաթիա-Սեբաստիա համայնքում մեր եւ տարբեր կայքերի կատարած հարցումները ցույց են տալիս, որ թիվ 7 ընտրատարածքում մարդիկ վստահեցնում են, որ ընտրելու են Սամվել Ալեքսանյանին, 8-ում էլ՝ կրկին Հանրապետական թեկնածուին, մարդիկ վախենո՞ւմ են տեսախցիկի առջեւ այլ պատասխան տալ, թե՞ այնտեղ իսկապես ՀԱԿ-ը կամ այլ կուսակցությունների ներկայացուցիչներ ընտրազանգված չունեն՝ Վահագն Խաչատրյանը պատասխանեց. «Մեր հարցումները հակառակն են ցույց տալիս: ՀՀ քաղաքացին այսօր այնքան վախեցած է, հատկապես Մալաթիա-Սեբաստիա համայնքում, մտածում են՝ իսկույն Սամվել Ալեքսանյանին կհայտնեն: Հիմա Սամվել Ալեքսանյանը չգիտի՝ ինչ պիտի անի, որովհետեւ այնտեղ հայտնվել է Նիկոլ Փաշինյանը, հայտնվել եմ ես»:
Արթուր Եղիազարյանը նշեց, որ ինքը հրապարակային անձ չէ, դրա համար համայնքում իրեն չեն ճանաչում, բայց երբ նկարը տեսնում են, իսկույն իմանում են՝ ում մասին է խոսքը. «Իսկապես համայնքում վախի մթնոլորտ է: Մարդը օրվա հացի խնդիր ունի լուծելու, ուղղղակի ասում են՝ շառից-փորձանքից հեռու: Իրենք համոզում են բնակչությանը, որ գնաս ընտրության, թե չգնաս՝ ոչինչ չի փոխվի»:
Քննարկմանը Վահագն Խաչատրյանը նաեւ հայտարարեց, որ «Բարգավաճ Հայաստանը» այս ընտրական գործընթացներում ընդդիմանում է իշխանության կարկառուն ներկայացուցիչ հանրապետականին: Հարցին՝ ԲՀԿ-ն ընդդիմությո՞ւն է ձեր կարծիքով, նա պատասխանեց, որ պաշտոնապես՝ ոչ. «ՀՅԴ-ն, «Ժառանգությունը» պաշտոնապես հայտարարել են այդ մասին, ԲՀԿ-ն չի հայտարարել եւ առայժմ իշխանության մեջ է»:
Կարդացեք նաև
Հարցին՝ ԲՀԿ-ն նույն խաղը այսօր չի՞ խաղում, ինչ 2008-ի նախագահական ընտրություններին՝ ՕԵԿ-ը, դա ավելի վտանգավոր չէ՞, քան ՀՀԿ-ն՝ Վահագն Խաչատրյանը պատասխանեց, որ իրենց անկեղծությանը կասկածելու դեռեւս տեղիք չունեն. «Խախտումների դեմն առնելու հանձնաժողովի աշխատանքներում մասնակցում են եւ որեւէ պրոբլեմ չեն առաջացնում: Իրավունք չունեմ բացառելու այդ եւ Գեղամյանի դեպքերը նույն, երաշխիքներ տալ չեմ կարող, բայց ինքը համենայնդեպս այս էտապում ընտրակեղծիքներին մասնակցություն չունի»:
Հռիփսիմե ՋԵԲԵՋՅԱՆ
