Այսօր Գյումրու Վարդան Աճեմյանի անվան դրամատիկական թատրոնի դահլիճում քաղաքաշինության նորանշանակ նախարար, ՕԵԿ-ական Սամվել Թադևոսյանի մասնակցությամբ տեղի ունեցավ 1 սենյականոց թվով 640 բնակարանների վիճակահանությունը: Եվ մինչ այդ լարված ու երկարատեւ պրոցեսը կսկսվեր` լրագրողներին մոտեցավ բնակբաշխման աշխատանքներին պարբերաբար մասնակցողներից մեկը ու, ցույց տալով հավաքվածներին, սկսեց կատակել. «Մի հատ ուշադիր նայեք նստածներին, այ էն տյոտյան Ֆրանսիայից է եկել, էն մի բեղավոր տղամարդուն տեսնո՞ւմ եք, նա էլ հաստատ Արգենտինայից կլինի, մարդիկ տուն են կորցրել, դրա համար էլ հայրենիք են հասել: Տեսեք ու գնահատական տվեք, մենք ոչ թե բնակբաշխում ենք իրականացնում, այլ «Արի տուն» ծրագիր, ո՞վ կկարողանար աշխարհասփյուռ գյումրեցիներին մի քանի օրվա մեջ թատրոնի դահլիճ բերել: Դե հիմա ասեք,մե՞նք ենք լավ աշխատում, թե՞ Սփյուռքի նախարարությունը»:
Նշենք, որ դահլիճում ասեղ գցելու տեղ չկար. 24 տարի շարունակ զրկված լինելով գլխներին մի տանիք ունենալու տարրական իրավունքից` մեկ սենյականոցի շահառուները եկել էին իրենց երեխաներով, թոռներով, ծոռներով , ամեն ոք իր հետ առնվազն 3-4 հոգի ուղեկցող էր բերել: Քիչ էր մնում մարդիկ շնչահեղ լինեին: Շահառուների գերակշռող մասը դժգոհ էին կառավարության վերաբերմունքից , նրանցից շատերը երկրաշարժին 2,3,4 սենյականոց բնակարաններ էին կորցրել, բայց այժմ նրանց որպես լավություն մեկ սենյականոց են հատկացնում ու ճանապարհում:
Այս մասին առավել մանրամասն վաղվա տպագիր «Առավոտում»:
Նունե ԱՐԵՎՇԱՏՅԱՆ
Կարդացեք նաև
