ՄԱԿ-ը հայտարարել է, որ Սիրիայում բռնությունները ուժգնանում են, ու սպառնալիքների թիրախ են դառնում այդ երկրում ապրող փախստականները:
ՄԱԿ-ի փախստականների հարցերով հանձնաժողովը հաղորդել է, որ Դամասկոսում անհայտ զինյալների կողմից իրենց բնակարանում սպանվել է իրաքցի փախստականի 7 հոգանոց ընտանիքը: ՄԱԿ-ի հանձնաժողովի մամուլի խոսնակ Մելիսա Ֆլեմինգն ասել է, որ ընտանիքի անդամները, ներառյալ երեխաները, սպանվել են մոտ տարածությունից:
Սիրիայում մոտավորապես 88 հազար իրաքցի փախստական կա, որոնք հիմնականում ապաստանել էին Դամասկոսում, եւս 8 հազար փախստականներ կան այլ երկրներից, ներառյալ՝ Սոմալիից, Աֆղանստանից:
Իրաքի պաշտոնյաները հաղորդում են, որ վերջին 48 ժամվա ընթացքում հարյուրավոր իրաքցիների օդանավերով դուրս են բերել Դամասկոսից: Իրաքի կառավարությունը մինչեւ ուրբաթ առավոտ 8 չվերթ է իրականացրել` Դամասկոսից դուրս բերելով 750 իրաքցիների, ասել է Իրաքի պետական ավիաուղիների պաշտոնյա Սաադ ալ-Խաֆային: Նա ասել է, որ կշարունակեն թռիչքները մինչեւ ոչ մի իրաքցի չմնա այնտեղ:
Հազարավոր մարդիկ, չնայած վտանգավոր իրավիճակին, սահմանը հատում են ցամաքային ճանապարհով:
Իրաքի արեւմտյան Անբար նահանգի մամուլի խոսնակն ասել է, որ Կարմիր Խաչը սահմանի մոտ վրաններ է տեղադրել ու բժշկական օգնություն ապահովել փախստականներին ընդունելու նպատակով: Նա հայտնել է, որ 30 ավտոբուս են ուղարկել Սիրիայի հետ սահմանի գլխավոր անցակետ՝ մարդկանց տեղափոխելու համար:
Սիրիա-Իրաք սահմանային անցակետերը գտնվում են սիրիացի ապստամբների հսկողության տակ:
