«Բարի լինեիք ձեր շտաբը բաց պահեիք: Եկել ենք, ձեր շտաբները փակ են եղել: Հայաստանից ժամանած պատվիրակությանն ու ընդդիմադիր պատգամավորներին քննադատելու փոխարեն՝ ավելի լավ կլիներ քո իսկ պաշտպանած թեկնածուի շտաբում լինեիք, որ շտաբը փակ չլիներ»,-Aravot.am-ի հետ զրույցում Արցախի նախագահական ընտրություններում պարտություն կրած թեկնածու Վիտալի Բալասանյանի օգնականին հակադարձեց ԱԺ փոխնախագահ, Արցախ մեկնած Հայաստանի դիտորդական պատվիրակության ղեկավար Էդուարդ Շարմազանովը:
Հ. Խանումյանի այն դիտարկմանը, թե հայ պատգամավորների համար Արցախը «Արմենիա» հյուրանոցի տեռասն էր, պարոն Շարմազանովն ասաց. «Գլուխը պատով է տալիս, թող բացի բոլոր արձանագրությունները, նայի: Երեք ուղղությամբ հետեւել ենք ընտրություններին՝ Էդուարդ Շարմազանով, Հրանտ Բագրատյան, Կարինե Աճեմյան , Խաչատուր Քոքոբելյան քառյակը եղել է Մարտակերտի շրջանում, բազմաթիվ գյուղեր են մտել եւ հետեւել ընտրական գործընթացին, հանդիպել ենք նաեւ Ռուսաստանի պետդումայի պատգամավորներին: Հաջորդ խումբը՝ Արմեն Ռուստամյանը, եղել է Ստեփանակերտում , Շուշիում ու Ասկերանում: Արտակ Զաքարյան, Արտակ Դավթյան, Մհեր Շահգելդյան խումբն էլ եղել է Հադրութի ու Մարտունու շրջաններում: Այդ երիտասարդը լավ կանի, ապատեղեկատվություն տարածելու փոխարեն մտածի, նոր խոսի՝ ով որտեղ է եղել»:
Պարոն Շարմազանովը հակադարձեց նաեւ Հ. Խանումյանի այն ասածներին, թե Հայաստանի ներկայիս խորհրդարանում աճել են Արցախի տարածքները վերադարձնող պատգամավորների թիվը. «Ազգային ժողովում չեմ հանդիպել մի պատգամավորի՝ լինի թե իշխանության, թե ընդդիմության ներկայացուցիչ, որոնք նման ցանկություն ունեն: Գուցե նման լուրեր տարածողները նման ցանկություն ունեն : Բազմաթիվ անգամ ասել ենք, որ Արցախի ժողովուրդը պետք է որոշի իր ապագան, իսկ Արցախի ժողովուրդը որոշել է՝ անկախ ժողովրդավարական ու ազգային Արցախի գոյությունն է: Այս նախագահական ընտրությունները եւս մի քայլ են՝ դեպի Արցախի Հանրապետության միջազգային ճանաչում»:
Կարդացեք նաև
Արփինե ՍԻՄՈՆՅԱՆ
