Կապան քաղաքում ընթացիկ տարվա 6 ամիսների տվյալներով` անչափահասների կողմից իրականացված հանցագործության 1 դեպք է գրանցվել` նախորդ տարվա 6 դեպքի փոխարեն: «Նվազել է նաեւ հանցագործ անչափահասների թիվը: Սյունիքի մարզում ընդամենը մեկ անչափահաս է հանցագործություն կատարել: Անչափահասների կողմից կատարած հանցագործությունների նվազման միտում նկատվում է ողջ հանրապետությունում: Այս տարվա 6 ամսվա արդյունքով` հանրապետությունում 68 դեպքի նվազում է արձանագրվել, նվազել է նաեւ հանցագործություն կատարած անչափահասների թիվը` 34-ով, ինչը դրական ու լավ ցուցանիշ է: 1996թ.-ից սկսած՝ մենք այսպիսի ցուցանիշ չենք ունեցել», -Կապանի քաղաքապետարանում տեղական ինքնակառավարման մարմինների խնամակալության եւ հոգաբարձուների հանձնաժողովների, հ/կ-ների եւ ոստիկանության ներկայացուցիչների մասնակցությամբ կայացած հանդիպման ժամանակ վիճակագրական տվյալները ներկայացրեց ՀՀ ոստիկանության քրեական հետախուզության գլխավոր վարչության 3-րդ վարչության պետի տեղակալ, գնդապետ Նելլի Դուրյանը:
Հանդիպումը նպատակ ուներ վեր հանելու Սյունիքի մարզում տվյալ ոլորտին առնչվող խնդիրները` հետագայում նպատակային միջոցառումներ ու ծրագրեր իրականացնելու դրանց լուծման ուղղությամբ, ինչպես նաեւ սեպտեմբերին ընդառաջ, նախապատրաստական ու կանխարգելիչ բնույթի աշխատանքների պլաններ մշակել: Ըստ Նելլի Դուրյանի` դպրոցներում ամենօրյա աշխատանքներ են տարվում, բայց այս ոլորտում լուրջ խնդիր ունեն: Հանրապետության դպրոցների թիվն ավելի է` քան տեսուչներինը, ինչը թույլ չի տալիս գործառույթները լիարժեք իրականացնել:
Տիկին Դուրյանը կարեւորել եւ դրական է գնահատել համայնքային, վերականգնողական կենտրոնների կատարած աշխատանքը: Հատկապես գոհ էր Կապանի վերականգնողական կենտրոնի աշխատանքից, որտեղ հաճախել են 122 անչափահաս, որից 33-ը ոստիկանության Կապանի բաժնի կողմից էին ներկայացվել:
Կարդացեք նաև
Մինչեւ հուլիսի 27-ը, երեխաների իրավունքների պաշտպանության համակարգի կատարելագործման նպատակով, նմանատիպ հանդիպումներ են անցկացվելու նաեւ մարզի մյուս քաղաքներում` Գորիսում, Մեղրիում ու Սիսիանում: Իսկ հանդիպումներն անցկացվում են «Վորլդ Վիժն»-ի կողմից իրականցվող «Հայաստանում երեխաների նկատմամբ բռնության նվազեցում» ծրագրի շրջանակում:
Մերի ՍՈՂՈՄՈՆՅԱՆ
