Խորհրդարանական աշխատանքները սկսելուն պես մամուլում մեծ աղմուկ բարձրացավ գեներալ Մանվել Գրիգորյանի՝ ԱԺ բերած սեւ օբսիդիանից սառնարանի շուրջ: Լուրեր շրջանառվեցին, որ ԱԺ որոշ աշխատակիցներ տեսել են, թե ինչպես է գեներալ Մանվելը ԱԺ-ի իր աշխատասենյակ բերել տվել այդ սառնարանը: Կառավարության ծրագրի քննարկման խորհրդարանական նիստերին բոլոր լրագրողները պտտվում էին գեներալի սենյակի շուրջ՝ փորձելով արանքներից տեսնել՝ կա՞ սառնարանը, թե՞ ոչ, եւ հաշվի առնելով, թե լրագրողներին ինչպես է ընդունում ու ճանապարհում Մանվել Գրիգորյանը, ոչ ոք չէր համարձակվում ներս մտնել ու սեփական աչքերով տեսնել:
Այսօր գեներալի աշխատասենյակի դուռը բաց էր, եւ օգտվելով առիթից, որ այնտեղ վերանորոգման աշխատանքներից բացի նաեւ հայավարի «ուբորկա» էր իրականացվում, Aravot.am-ը լուսանկարեց Մանվել Գրիգորյանի աշխատասենյակի ողջ գույքը: Այնտեղ էլեկտրական գազ կար, սեղաններ, փաստաթղթեր, բայց օբսիդիանից սառնարան չկար:
Կարդացեք նաև
Բացի այդ, այս օրերին նաեւ հասցրել են պատգամավորների աշխատասենյակների վրա փակցնել նրանց անուններով ցուցանակները: 311 սենյակը մեր Մարգարիտ Եսայանինն է, սակայն ցուցանակի վրա նրա անունը սխալ էր գրված՝ Մարգարիտի փոխարեն՝ Մարգարիտա:
Հռիփսիմե ՋԵԲԵՋՅԱՆ
