Գյումրիում տեղի ունեցող ՏԻՄ ընտրությունները առանձնապես աչքի չընկան իրենց ակտիվությամբ. քաղաքի կենտրոնական հատվածում տեղակայված ընտրատեղամասերում մինչև կեսօր շատ քիչ քանակությամբ մարդիկ էին գնում ընտրության: Այս մասին մեզ հետ զրույցում զարմացած փաստում էին հենց ընտրատեղամասային ընտրական հանձնաժողովի նախագահները:
Չնայած դրան` կային առանձնակի թաղեր, որտեղ այնուամենայնիվ աղմկոտ միջադեպեր էին գրանցվում: Օրինակ` դրանցից մեկը ԲՀԿ Շիրակի մարզային կառույցի պատասխանատու, ԱԺ պատգամավոր Մարտուն Գրիգորյանի թաղն էր` «Արցախը» կամ գյումրեցիների լեզվով ասած «Թուրքի մայլեն»: Մեր այցի ժամանակ`թաղի թիվ 5 դպրոցում տեղակայված ընտրատեղամասը ոստիկանախեղդ էին արել, ըստ հանձնաժողովականների, ոստիկանության Շիրակի մարզային վարչության պետ Կարեն Բաբակեխյանը անձամբ էր այցելել այստեղ` կարգ ու կանոն հաստատելու:
Ասյա Սարգսյան
Իսկ թե ի՞նչ սկանդալ էր տեղի ունեցել, թիվ 34/28 ընտրատարածքային ընտրական հանձնաժողովի նախագահ Ասյա Սարգսյանը հուզված հետևյալը պատմեց. «Այստեղ խմբերով կանգնած մատնացույց էին անում 4-րդ համարը: Մենք միլիցային քանի անգամ զգուշացրեցինք, որ ամբոխին ցրի ու անընդհատ լարված վիճակ էր. կուչկա-կուչկա կանգնած, անընդհատ գոռում էին `4-րդ համար, 4-րդ համար:Ու շորերը փոխելով գալիս էին, որպեսզի մենք չճանաչեինք: Վստահված անձանց ու միլիցայի միջոցով մեծ համառությամբ էդ կուտակվածներին մի կերպ ցրեցինք: 20 րոպե չանցած` մի 3-4 տղա եկան` բա էստեղ ո՞ վ է նախագահն, ես ասի `ես, հարցրին, թե ո՞ ր կուսակցությունից եք` Բարգավաճից, ասի` ես կուսակցություն չեմ ներկայացնում, ուղղակի նախագահն եմ: Ասին` ձեզ դուրս են կանչում, ասի` կներեք ես դուրս գալող չեմ, ընտրություն է, ես ո՞ նց կարող եմ տարածքը լքել և դուրս գալ, եթե հարցեր ունեք` խնդրեմ եկեք սենյակ , ձեր հարցերը տվեք: Համառորեն նորից կրկնեցին ` ձեզ կանչողը Մարտունն է, հարցրի Մարտունն ո՞ վ է, ասին պատգամավոր Մարտուն Գրիգորյանը:
Կարդացեք նաև
Անցավ մի քանի րոպե, ներս մտավ Թամիրյան Արմենը, հարցրի ի՞ նչ եք ուզում, ընտրո՞ ղ եք, բա չէ, իրեն ճանաչելով, ես միշտ նախագահ եմ եղել ու նրա հետ աշխատել եմ, ասի` դուք անհարմար չե՞ ք զգում ինձ դուրս եք կանչում: Ասում է՝ ուզում ենք իմանալ ընտրողների քանակը, ես էլ պատասխանեցի` դուք ունեք վստահված անձինք, աշխատողներ, դուք կարող էինք ձեր աշխատողների միջոցով իմանալ, մանավանդ ընտրողների թիվը 2 ժամը մեկ հայտնում ենք, էլ ի՞ նչ միտք կա, որ ինձ դուրս եք հրավիրում: Նայեցի պատուհանից` լիքը մեքենաներով մարդիկ էին կանգնած, ու ես դուրս չեկա: Արմենի դուրս գալուց հետո տեսա, միլիցաները եկան: Վերջը պատգամավոր է` թող մի քիչ կարգ ու կանոնը հարգի, ոչ թե կանչի ինձ դուրս, չնայած ասեմ,` ես վախեցողներից չեմ, ես միշտ մաքրամաքուր եմ աշխատել»:
Տիկինը նաև փաստեց, որ պատգամավորի ուղարկած թաղի տղեքը առանց մի վայրկյան դադարի`անընդհատ կոչ են արել ընտրել թե ավագանու և թե քաղաքապետի ցուցակի 4-րդ համարին: Նշենք, որ քաղաքապետի թեկնածուների ցուցակում 4-րդ համարը զբաղեցնում է ՀՅԴ-ական Հովսեփ Սիմոնյանը, և սա այն դեպքում, երբ ԲՀԿ-ն Գյումրիում առաջադրել է սեփական թեկնածուին` Սամվել Բալասանյանին:
Նունե ԱՐԵՎՇԱՏՅԱՆ
