Եվրախորհրդարանի լիագումար նիստում րոպեներ առաջ տեղի ունեցավ Ռամիլ Սաֆարովի գործով քննարկում: Այն անցկացվում էր մարդու իրավունքների և ժողովրդավարության հարցերի վերաբերյալ քննարկման շրջանակներում:
Քննարկումից հետո քվեարկության դրվեց Եվրախորհրդարանի բանաձևը՝ Սաֆարովին Ադրբեջան արտահանձնման և Ադրբեջանի իշխանությունների կողմից ներման արժանացնելու մասին: Մինչ բանաձևը քվեարկության դնելը խորհրդարանականները հանդես եկան կարճ ելույթներով, որոնց մեծամասնությունը պարունակում էր կոշտ դիրքորոշումներ: Նրանք անգամ այնքան վրդովված էին, որ նրանցից մեկը Իլհամ Ալիևին անվանեց մաֆիայի պարագլուխ:
Քննարկումից հետո բանաձևը դրվեց քվեարկության, եւ ընդունվեց: Բանաձևը կներկայացվի խորհրդարանի հաստատմանը:
Բանաձեւում, մասնավորապես, դատապարտվում է Իլհամ Ալիեւի որոշումը՝ հանցագործին ներում շնորհելու վերաբերյալ, նշելով, որ այդ քայլը կարող է է՛լ ավելի թեժացնել հայ – ադրբեջանական լարվածությունը եւ երկու ժողովուրդների միջեւ առկա անդունդը։ «Սաֆարովի ազատ արձակումը հակասում է դատապարտված անձանց արտահանձման մասին միջազգային կոնվենցիայի ոգուն», – գրված է բանաձեւի մեջ:
Կարդացեք նաև
Անդրադարձ կա նաեւ այն բանին, որ Ալիեւի կողմից Սաֆարովին ներում շնորհելը իրականացվել է Հունգարիայի իշխանություններին տրված դիվանագիտական երաշխիքների խախտմամբ։ Բանաձեւում դատապարտվում է նաեւ մարդասպանի հերոսացումը, նրան մայորի կոչում եւ 8 տարվա աշխատավարձ տալը: «Այս քայլը վտանգի տակ է դնում հաշտեցմանը տանող գործընթացները եւ կարող է խափանել նաեւ ապագայում ժողովուրդների միջեւ դեմ առ դեմ շփման հնարավոր զարգացումները»,-գրված է բանաձեւում։
Քիչ անց կներկայացնենք նաև խորհրդարանականների ելույթներում հնչած առանցքային դիրքորոշումները:
Տաթև ՀԱՐՈՒԹՅՈՒՆՅԱՆ
