«Ժառանգություն խմբակցության ղեկավար Ռուբեն Հակոբյանին Aravot.am-ը խնդրեց մեկնաբանել այն քննադատությունները, որոնք կապված են Րաֆֆի Հովհաննիսյանի մանդատը վայր դնելու հետ: Մասնավորապես, «Ժառանգությանը» քննադատում են անորոշության մեջ, որ ընդամենը մանդատի հարցն այդքան ձգձգեց, եւ որ Րաֆֆի Հովհաննիսյանի նման հնարքներն արդեն չեն էլ զարմացնում: Պարոն Հակոբյանի պարզաբանմամբ՝. «Չեմ կիսում այդ գնահատականները, եթե ոմանց մոտ դա դիտվում է անորոշություն, լավ կլինի իրենց քաղաքական կեցվածքով ժողովրդին զարմացնեն: Իսկ Րաֆֆի Հովհաննիսյանի քայլը զարմանալի չէր»:
ՀԱԿ խմբակցության ղեկավար Լեւոն Զուրաբյանը մտահոգություն է հայտնել, որ ԼՂՀ անկախության ճանաչումն այս պահին բանակցային գործընթացը փակուղի կմտցնի: Հարցին՝ չե՞ք կիսում այս տեսակետը՝ պարոն Հակոբյանը պատասխանեց. «92-ի հուլիսի 28-30-ը Գերագույն խորհրդում այս նույն օրակարգում հարցը դրվեց շրջանառության եւ քննարկվեց: Այդ ժամանակ ՀՀՇ-ն էր իշխող մեծամասնությունը: Իրենք այդ ժամանակ, ցավոք սրտի, այդ նույն դիրքորոշումով ներկայացան: Սա որեւէ մեկի մենաշնորհը չի այս նախաձեռնությունը: Ինչու է համառորեն ՀԱԿ-ը պնդում, որ դրա մեջ ռիսկ կա: Դա գենետիկ մտավախություն է, որ ՀՀՇ-ն ունի, բայց լավ է, որ շատ լուրջ քաղաքական ուժեր արդեն հաղթահարել են դա»:
Հռիփսիմե ՋԵԲԵՋՅԱՆ
