«Լավ գինի ստանալու համար լավ խաղող է պետք, որն ունեք, ձեզ մոտ խնդիրը փորձի եւ տեխնոլոգիաների պակասն է»,-այսօր ՀՀ էկոնոմիկայի նախարարությունում հրավիրված ասուլիսում ասաց Իտալիայի սոմելիեների, հյուրանոցների ռեստորանների ֆեդերացիայի անդամ Լուկա Կանապիկին: Նա Հայաստան էր ժամանել Արենիում օրերս տեղի ունեցած գինու փառատոնին մասնակցելու: Լուկա Կանապիկին լրագրողներից մեկի հարցին պատասխանելով՝ հայկական գինին տասը բալանոց սանդղակով գնահատեց 7: Ֆրանսիայում, 2008թ.-ին «Gault Millau» պարբերականի կողմից տարվա լավագույն սոմելիե ճանաչված Սերժ Ղուկասյանը վերջին անգամ 2007-ին էր եղել Հայաստանում եւ հայկական գինին այդքան էլ չի հավանել, սակայն այս տարի սոմելիեն որակական ու համային մեծ փոփոխություն էր նկատել: Նա համոզված է, որ այժմ հայկական գինին հանգիստ կարող ենք արտահանել Ֆրանսիա, Իտալիա, ԱՄՆ: Լուկա Կանապիկիի խոսքերով էլ, Արենիի տարածաշրջանի բնակիչները կարող են գինով, համեղ ուտելիքներով տուրիզմը զարգացնել, ինչպես, որ ներկայումս անում են Իտալիայի շատ շրջաններ. «Հատկապես, որ Արենիի քարանձավը մեծ գանձ է ձեզ համար»:
Կարդացեք նաև
Հարցին, թե Վրաստանը վերջերս գրանցել է գինու հեղինակային իրավունքը եւ հայտարարել, որ գինու հայրենիքը Վրաստանն է եւ արդյոք հայկական գինու հեղինակությունը չի տուժի դրանից, զբոսաշրջության վարչության պետ Մեխակ Ապրեսյանը պատասխանեց. «Վայոց Ձորում հայտնաբերած քարանձավն ապացուցում է, որ պատմության մեջ դրանից հին գինի չի եղել: Այն 6000 տարվա պատմություն ունի: Պետք է կարողանանք փաստերը ճիշտ գնահատենք»:
Գինու համտեսին եկած այս երկու հյուրերն էլ գինեգործների հետ վարպետաց դասեր էին անցկացրել` հատկապես կարեւորելով գինի խմելու համար կավե բաժակների օգտագործումը: Նախարարության Արդյունաբերության քաղաքականության վարչության պետ Հայկ Միրզոյանի տվյալներով, գինեգործության ոլորտում տարեկան միջինը 20 % աճ է արձանագրվում, իսկ ներդրումների ծավալը կազմում է 11,8 %: Ըստ պարոն Միրզոյանի, արդեն պատրաստ է գինեգործության զարգացման ռազմավարությունը, որը շուտով կներկայացվի ՀՀ վարչապետին կից արդյունաբերական խորհրդին:
Լուսինե ԲՈՒԴԱՂՅԱՆ
