Հոկտեմբերի 25-ին նախագահ Սերժ Սարգսյանը շնորհավորական ուղերձ էր հղել Թուրքիայի նախագահ Աբդուլլահ Գյուլին՝ Թուրքիայի ազգային տոնի առթիվ, թեեւ այն նշվում է հոկտեմբերի 29-ին, իսկ Ս․Սարգսյանը փաստորեն չորս օր շուտ է շնորհավորել թուրք գործընկերոջը։
ՀՅԴ Հայ դատի եւ քաղաքական հարցերով գրասենյակի պատասխանատու Կիրո Մանոյանին «Առավոտ»-ը հարցրեց, թե ինչպե՞ս է գնահատում այս քայլը՝ հաշվի առնելով հայ-թուրքական արձանագրությունների, ԼՂ-ի խնդրի նկատմամբ Թուրքիայի դրսեւորած կողմնակալ վերաբերմունքը։ «Եթե ամսաթիվ չեն շփոթել, ապա իսկապես անհասկանալի է այսչափ շտապողականությունը։ Չնայած, այնքան էլ հասկանալի չէ ընդհանրապես շնորհավորելու պահը, որովհետեւ Հայաստան-Թուրքիա արձանագրությունների, ԼՂ-ի խնդրի ուղղությամբ Թուրքիան օգտագործում է ամեն հարցում արտահայտվելու իրավունք է իրեն վերապահում, անգամ Ստեփանակերտի օդանավակայանի հարցում պարտավորված են իրենց զգում ինչ-որ բան ասել: Միակ հավանական բացատրությունը թերեւս այն է, որ Իրանի հետ պայմանագիր ստորագրվեց, եւ նախագահը արեւմուտքին ուզում է ասել, թե պատրաստ է նաեւ Թուրքիայի հետ լեզու գտնել։ Այլապես, իսկապես ոչ մի բացատրություն, արդարացում չկա, թեեւ դա էլ արդարացում չէ, որովհետեւ ի վերջո պարզ է բոլորին, որ Հայաստանի այսօրվա իրավիճակի համար պատասխանատվություն ունի նաեւ Թուրքիան, որը թշնամական վերաբերմունք է ցուցաբերում Հայաստանի նկատմամբ՝ ՀՀ անկախության առաջին օրվանից պայմաններ առաջ քաշելով, շրջափակման ենթարկելով եւ մերժելով դիվանագիտական հարաբերությունների հաստատումը։ Սա բարեկամական կեցվածք չէ, ավելի քան 20 տարի է, ինչ Թուրքիան թշնամական վերաբերմունք է դրսեւորում, եւ հետեւաբար մենք մեզ չպետք է պարտավորված զգանք ամեն անգամ ցույց տալու, թե մենք խելոք տղերք ենք»,- նկատեց Կիրո Մանոյանը:
Էմմա ԳԱԲՐԻԵԼՅԱՆ
Կարդացեք նաև
Հ.Գ. Մանրամասները կարող եք կարդալ վաղվա տպագիր «Առավոտ»-ում:
