Հայաստանի հյուսիսում գտնվող Տավուշի մարզի Ներքին Կարմիրաղբյուր գյուղը Երևանից շուրջ 200 կմ հեռավորության վրա է գտնվում, իսկ հայ-ադրբեջանական սահմանից ուղիղ գծով բաժանվում է 800 մետրով: Տավուշի մարզի և Ադրբեջանի միջև 352 կմ ձգվող սահմանի 9 կմ-ն անցնում է հենց Ներքին Կարմիրաղբյուրով, և գյուղը մշտապես գտնվում է հակառակորդի նշանառության տակ:
Սահմանամերձ այս գյուղերում ժամանակը կարծես կանգ է առել՝ հարազատ մնալով անցյալ դարավերջին: Այս կողմերում յուրաքանչյուր քայլափոխին հանդիպող գնդակոծություններից վառված ու ավերված տների, գործարանների պատերը, փամփուշտների հետքերը, խրամատներով շրջապատված ճանապարհներն ու կրակոցների ձայները ոչ վաղ անցյալի պատերազմի ու անհանգիստ սահմանի վկաներն են:
Քաղաքականությունն այստեղ լուռ է և իր մասին հիշել է տալիս բացառապես նախընտրական շրջանում:
Ու չնայած արդեն սովորական դարձած կրակոցներին ու դժվարություններին`գյուղում կյանքը շարունակվում է բնականոն հունով…
Գոհար Աբրահամյան՝ (mynews.am)
