Հուշարձանագետ Սամվել Կարապետյանն այսօր «Հայելի» ակումբում հայտարարեց, որ Վրաց պատրիարք Իլյա Երկրորդի՝ Լեռնային Ղարաբաղի վերաբերյալ արած հայտնի արտահայտությունը, թե Լեռնային Ղարաբաղը եղել եւ մնում է Ադրբեջանի անքակտելի մասը, ինչպես Հարավային Օսիան եւ Աբխազիան ՝Վրաստանինը, հավելեց, որ դա իշխող մտայնություն է Վրաստանում, եւ բոլոր վրաց կառավարությունների ու նախագահների օրոք էլ Վրաստանն իր կեցվածքը հայերի հանդեպ չի փոխել:
«Իրենք Արցախի ազատությանը դեմ են, որովհետեւ Աբխազիայի եւ Օսիայի խնդիրն ունեն, եւ բնականաբար իրենց կորցրածը հետ բերելու առումով չեն կարող պաշտպանել Արցախի անկախությունը… Առհասարակ վրաց հասարակությունը մտածում է այնպես, ինչպես Իլյան ասել է: Իսկ ես ենթադրում եմ, որ կարող է ասած լինել, որովհետեւ դա գերիշխող տեսակետ է Վրաստանում»,- նշեց հուշարձանագետը:
Նա նաեւ զուգահեռներ տարավ այսօրվա պաշտոնական Թբիլիսիի եւ Վրաց Հերակլ արքայի՝ հայերի հանդեպ ունեցած վերաբերմունքի միջեւ. «Այս պահին հիշեցի, որ ժամանակին Արցախի մելիքների դեմ պայքարող Իբրահիմ խանը Հերակլ թագավորի ամենամտերիմ դաշնակիցն է եղել: Հայերի դեմ պայքարում Շուշիին տիրացած Իբրահիմ խանին միշտ սատարել է Հերակլ թագավորը: Եվ երբ երբեմն Հերակլն այնուամենայնիվ որոշ անհավատարմություն էր դրսեւորում կամ այդքան էլ սուր կերպով հայերի դեմ չէր դրսեւորում իրեն, անմիջապես Իբրահիմը գտնում էր նրան պատժելու ձեւը»:
Գոհար ՀԱԿՈԲՅԱՆ
