«Ամբողջական ֆիլմ է, որում կապվել են 2 հերոսամարտեր՝ Մուսա լեռան հերոսական պաշտպանությունն ու Խնապատինը: Գյուղը պաշտպանվել է գյուղացու շնորհիվ, այն ապրում եւ աճում է, դա մեր հաղթանակի կոդն է»,-այսօր լրագրողների հետ հանդիպման ժամանակ «Մուսա լեռից Խնապատ» փաստավավերագրական թվով 4-րդ ֆիլմի մասին նշեց քաղաքագետ Լեւոն Մելիք-Շահնազարյանը:
Նրա պնդմամբ մեր պահանջներն ավելի շատ են քան մեր պետության հնարավորությունները, հայ հողագործը միշտ պատրաստ է բահը դնել վայր եւ զենք վերցնել պայքարի համար.
«Մեծ դաստիարակչական նշանակություն կունենա ֆիլմը մեր ժողովրդի եւ երիտասարդության համար, չնայած նրանում պատերազմ չկա: Ֆիլմը շատ հուզիչ է, նրա անկեղծությունը ստիպում է, որ տարվես այդ ֆիմով եւ հավատաս ապագային»:
Քաղաքագետի համոզմամբ՝ պատերազմ կրկին լինելու է, հետեւաբար մեր ազգը պետք է պատրաստ լինի դրան: Գլխավոր հերոսը հայ գյուղացին ու հողագործն է, ով առօրյա կյանքում չի տարբերվում հասարակ անհատից:
Կարդացեք նաև
Ֆիլմի ռեժիսոր Գագիկ Հարությունյանի խոսքով ֆիլմի գաղափարը վաղուց կար, նրանց խումբը մասնակցել էր պատերազմին եւ Խնապատը ճանաչում էր.
«Նմանատիպ կղզիներ մեր պատմության մեջ միշտ եղել եւ կրկնվում են: Ֆիլմը փաստավավերագրական է՝ գեղարվեստական էլեմենտներով համեմված, հունվարի 28-ին կլինի ֆիլմի պրեմիերան, այն նաեւ կթարգմանվի օտար լեզուներով»:
Անժելա ՇԱՀՈՒՄՅԱՆ
