«Չենք պատրաստվում որեւէ մեկին ճնշել, ունեզրկել եւ նրա ունեցվածքն ուրիշներին բաժանել»
Այսօր Երեւանի Դավիթաշեն համայնքում բնակիչների հետ հանդիպման ժամանակ ՀՀ նախագահի թեկնածու, գործող նախագահ Սերժ Սարգսյանը խոսեց իր ծրագրի տնտեսական հատվածից: Նրա խոսքով՝ ենթադրյալ եւ տեսական արդարությունից մենք պետք է անցնենք իրական արդարութան, ինչի համար մեր հասարակության յուրաքանչյուր անդամ պարտավոր է ընտրություն կատարել եւ պատասխանատվություն կրել այդ ընտրության համար:
Թեկնածուի կարծիքով մենք պետք է հրաժարվենք համահավասարեցման սկզբունքից եւ նպատակային օժանդակենք նրանց, ովքեր զգում են դրա կարիքը: «Մենք պետք է ընտրություն կատարենք, օրինակ, իր օրվա հացի համար գիշեր-ցերեկ աշխատող մանր ու միջին ձեռնարկատերերի եւ մեծ առեւտրային ծավալներ ունեցող գործարարների միջեւ: Չէ՞ որ, եթե առաջիններին չպաշտպանենք, ապա վերջինները նրանց կարող են պարզապես խժռել»,-ասաց նախագահը` վստահեցնելով որ բնավ էլ նկատի չունի կուլակաթափությունը:
Ասաց` չենք պատրաստվում որեւէ մեկին ճնշել, ունեզրկել եւ նրա ունեցվածքն ուրիշներին բաժանել. «Անցել են այն ժամանակները, երբ մի կով ունենալու համար մարդուն կարող էին Սիբիր աքսորել: Մենք պետք է հասկանաք, որ դրամն օրինական վարձատրություն է` կատարված աշխատանքի եւ ձեռնարկված ռիսկի համար: Պետք է հասկանանք, որ մեր երկրում եղած դրամով պետք է ստեղծվի ազգային կապիտալ: Որքան էլ մենք խեթ-խեթ նայենք խոշոր գործարարներին, մտածենք, որ նրանք մեզնից են գողացել ինչ որ ունեն, այնուհանդերձ, այդ խոշոր կապիտալով է նաեւ ձեւավորվում մեր ազգային կապիտալը»:
Կարդացեք նաև
Նելլի ԳՐԻԳՈՐՅԱՆ
