«France Football» հանդեսում տպագրված լրագրողական հետաքննությունն այն մասին, իբրեւ Քաթարը գնել է 2022 թվականի աշխարհի առաջնությունը, նոր զարգացումներ է ստանում:
Կոռուպցիայում մեղադրվող անձանց ցուցակում հայտնվել են Ֆրանսիայի նախկին նախագահ Նիկոլյա Սարկոզիի եւ ՈՒԵՖԱ-ի նախագահ Միշել Պլատինիի անունները: Ըստ այդմ, քվեարկությունից առաջ Սարկոզին Քաթարի արքայազն Թամիմ բեն Համադ բին Խալիֆ Ալ-Թանիի հետ Պլատինիին ճաշի է հրավիրել եւ համոզել, թե ում օգտին պետք է քվեարկել: Պլատինին ընդունում է այդ հանդիպման փաստը, սակայն պնդում է, որ համոզելու մասին ոչ մի խոսք չի եղել եւ Ֆրանսիայի նախագահը խոսել է միայն ֆրանսիական ֆուտբոլում ներդրումների մասին:
ՖԻՖԱ-ի նախկին փոխնախագահ Ջեք Ուորները ֆուտբոլային այս սկանդալի առնչությամբ հայտարարել է, թե բացառված չէ, որ ՖԻՖԱ-ի գործկոմի անդամներ, կամերունցի Իսսա Հայատուն, պարագվայցի Նիկոլաս Լեոսան, արգենտինացի Խուլիո Գրոնդոլան եւ գվատեմալացի Ռաֆայել Սալգադոն Քաթարին իրենց ձայնը տալու համար ընդհանուր առմամբ ստացած լինեն $ 20 միլիոն:
Աշոտ ՀԱԿՈԲՅԱՆ
