«Հուշարձանների պահպանության օրենքը շատ անգամ չի կիրառվում, մենք կորցնում ենք պատմական բազմաթիվ մշակութային կոթողներ»,-այսօր լրագրողների հետ հանդիպման ժամանակ Երեւանի նշանակալի կառույցների ճակատագրից խոսեց ճարտարապետների միության նախագահ Մկրտիչ Մինասյանը:
Նրա պնդմամբ՝ վերջին տարիներին մենք կորցրել ենք բազմաթիվ ճարտարապետական կառույցներ: Լավագույն տուրիստական երկրներում հուշարձանները պահվում են աչքի լույսի պես, որովհետեւ դրանք գումար են բերում: Օրենքի չկիրառման պատճառով մենք կորցնում ենք Երիտասարդների պալատը, «Սեւան» հյուրանոցը, Փակ շուկան: Բազմաթիվ արտասահմանցիներ եւ ռուսներ զարմացած են, թե մեր ձեռքը ինչպես է բարձրանում նման հուշարձանների վրա.
«Երեւանը գեղեցիկ քաղաք է, հիասքանչ կենտրոնով, լանդշաֆտով, բայց այդ բոլորին մենք վերաբերվում ենք բարբարոսաբար: Ճարտարապետական նշանավոր կառույցները հսկայական ներուժ են պարունակում»:
Ճարտարապետ Սաշուր Քալաշյանի համոզմամբ՝ ամեն մի հուշարձան մեր ազգային մշակույթի դիմագիծն է, մենք այսօր ոտնահարում ենք կարեւորագույն հուշարձանները:
Կարդացեք նաև
Արտաքին գործերի նախարարության շենքին անդրադառնալով՝ բանախոսները նշեցին, որ իրենք շատ մտահոգված են այդ հարցով, որովհետեւ այդ գեղեցիկ կառույցի մեջ ցանկանում են հյուրանոց ստեղծել, այդպիսով նա կկորցնի իր հմայքը, նշանակությունն ու արժեքը:
Պրն Քալաշյանի խոսքով՝ մենք այսօր գործ ունենք կարեւորագույն շենքի հետ, որը ներկայացնում է մեր պետականությունը: Օրենքը չի արգելում վաճառել հուշարձանները, սակայն կարգ ու կանոն կա այդ ամենի մեջ: Ցանկացած հուշարձան չի ներկայանում արտաքնապես, այլ նաեւ ներքին բովանդակությամբ:
Անժելա ՇԱՀՈՒՄՅԱՆ
