Այսօր դարձյալ Գյումրիում էր ՀՀ ոստիկանապետ Վլադիմիր Գասպարյանը, ով բավական երկար զրույցի բռնվեց լրագրողների հետ` պատրաստակամորեն պատասխանելով բոլոր հարցերին:
Լրագրողները ոստիկանապետից հետաքրքրվեցին, թե Գյումրիում հնչած կրակոցների գործով ոստիկանությանը զենքերի ի՞նչ տեսակներ հաջողվեց տանել Գյումրիից: Ի դեպ, նշենք, որ այս օրերին առգրավված բազմաթիվ զենքեր էին շարված Գյումրիու ոստիկանապետի առանձնասենյակում: Վլադիմիր Գասպարյանի տեղեկացմամբ, դրանք կազմում են առգրավված զենքերի 1/3-ը, իսկ մեծ մասը տեղափոխված է Երևան`փորձաքննության:
Ի պատասխան լրագրողների հարցի, ոստիկանապետն ասաց. «Ես Գյումրիից չեմ եկել ինչ-որ մի բան տանելու: Ես Գյումրի եկել եմ ինչ-որ բան բերելու: Ես ուզում եմ, որ Գյումրիում լինի խաղաղություն: Ես ուզում եմ, որ Գյումրիում զենքերը չկրակեն: Ես ուզում եմ, որ զենքերը հանձնվեն: Ես ուզում եմ, որ մարդիկ հասկանան, որ ուժով հարց չեն լուծում, սպանությունով ոչինչ չես լուծի, անօրինականությամբ օրինականություն չես հաստատի: Ես այստեղ բերել եմ իմ ընկերների, իմ գործընկերների, աշխատակիցների կամքը, որ մինչև վերջ ենք մենք աշխատում այս ուղղությամբ ու անընդհատ պրոցես է լինելու: Իսկ էստեղից ի՞նչ եմ տարել, էստեղից տարել եմ գյումրեցիների շնորհակալությունը: Ես երախտապարտ եմ, մենք դեռ ոչինչ չարած, ընդամենը մի քայլ, մի չինչին քայլ արած այսօր ստանում ենք գյումրեցիների շնորհակալությունը, դրանից մեծ ձեռքբերում այսօր ոստիկանությունը չունի: Այնպես որ մենք տանում ենք այն , ինչ անհանգստացնում է գյումրեցուն և բերում ենք այն, ինչ կխաղաղեցնի գյումրեցիներին»:
Aravot.am-ը ոստիկանապետին հարցրեց, թե ի՞նչն էր խանգարում ավելի վաղ , օրինակ մեկ ու կես տարի առաջ սանձել իր խոսքերով ասած Գյումրու երկու կլաններին, շնորհակալական խոսքերից բացի, գյումրեցիները նաև այսպիսի քննադատություններ են հնչեցնում ոստիկանապետի հասցեին: «Սկզբից եղել է խոսք, բացատրվել է, աշխատվել է, երբ բացատրում ես, թե ինչպիսին պետք է լինեն, ոնց պետք է լինեն, երբ տեսնում ես, որ կողմերը իբր թե ընկալում են, բայց իրենց գործողությունների մեջ տեսնում ես, որ ճշմարիտ չեն… Ես կողմնակից եմ, որ տան հնարավորություն շտկվելու, պատժել միշտ կարելի է: Հասկանում եք, մենք պետք է բժշկենք, ոչ թե պատժենք, ես առաջինը դա եմ գտնում: Այո, դեպք եղավ, կբռնենք, բայց բժշկել է պետք, իսկ էդ բժշկելը ոստիկանությունը ինչ-որ պրոցեսներ կարող է անի: Ինչ-որ տեղ կարող է բերի հասցնի, բայց դրանից հետո ոստիկանությունը ի վիճակի չի լինելու ոչինչ շտկելու, որովհետև կան մեթոդներ, որոնք սահմանափակվում են, ու գալիս է արդեն քաղաքացիների օգնության, լրագրողների օգնության, հասարարական, քաղաքական կուսակցությունների…Եթե համահունչ չաշխատենք, ի՞նչ է, ուզում եք ոստիկանական պետություն լինի՞: էդ ձևի չի կարելի հանդուժել: Ես օր առաջ ուզում եմ Գյումրին թեթևացնել ոստիկանությունից, չեմ գտնում, որ ոստիկանությունը պետք է այնպես անի, որ բոլորը հավատան, ոստիկանությունը պետք է իր սկզբունքները, իր աշխատանքային մեթոդները դնի կանխատեսելիության, ծառայության առումով և հանցագործության դեմ պայքարում անկանխատեսելիության սկզբունքները: Դա դրված է , այլևս այդպես է աշխատելու, կոնկրետ օրինակով, կոնկրետ գործերով մենք դա անում ենք»,-վստահեցրեց Վլադիմիր Գասպարյանը:
Կարդացեք նաև
Նունե ԱՐԵՎՇԱՏՅԱՆ
