Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանն այսօր բավարարեց էպոսագետի, ԱԻՄ առաջնորդ Պարույր Հայրիկյանի դեմ մահափորձի գործով մեղադրվող Վարդան Սեդրակյանի պաշտպան Ալեքսանդր Սիրունյանի միջնորդությունը:
Հաջորդ դատական նիստին` հուլիսի 12-ին դատարան են հրավիրվելու ոստիկանության երկու ձգաբաններ եւ դատաբժիշկ Ադամյանը:
Ամբաստանյալ, Պարույր Հայրիկյանի վրա կրակած Խաչատուր Պողոսյանի պաշտպանը ` Լյուդվիգ Ավետիսյանը միջնորդել էր դատաբժշկական, դատաձգաբանական, դատահետքաբանական փորձաքննություն անցկացնելու մասին: Պաշտպանը գտնում էր, որ իր այսօրվա վեց միջնորդությունները քանակի համար չէր արվել, այլ, որ ինքը կատարում է դատախազի գործառույթը:
Մեղադրող Արամ Ամիրզադյանը կոռեկտ չհամարեց նախկին քննիչի արած հայտարությունը, եւ հրապարակեց միջնորդության բովանդակությունը:
Կասկածի տակ էր առնվել ժանգոտ զենքի պիտանի լինելը, դեպքի վայրից գտնված գնդակի վրա արյուն չլինելու հանգամանքը, տուժող Պարույր Հայրիկյանի պիջակի աջ կողմի պատռված քանդված լինելը կամ թե` հրազենային չլինելը: Մեղադրողը մի քանի մասնագիտական բացատրություններ տվեց, մասնավորապես, որ զենքի ժանգոտ լինելը դեռ չի նշանակում, որ այն պիտանի չէ կրակելու համար, անդրադարձավ Հայրիկյանի պիջակին, որը դատարան էր բերվել եւ որպես ապացույց հետազոտվել էր…
Մեղադրողը գտնում էր, որ պաշտպանի միջնորդությունը ոչ թե հարց է, այլ պարզաբանում պահանջող խնդիր, ուստի չառարկեց, որպեսզի դատարան կանչվեն փորձագետները:
Կարդացեք նաև
Պաշտպան Լյուդվիգ Ավետիսյանը նույնպես չէր առարկում, որ դատարան գան փորձագետները, սակայն «ինադ» էր ընկել դատախազի հետ: Դատավորն արձանագրեց, որ կողմերը փորձագետի հետ կապված ունեն հարցեր, սակայն հարցրեց. «միջնորդությունը վտանգավորությամբ հղի՞ է»:
Ամբաստանյալ Վարդան Սեդրակյանի պաշտպան Ալեքսանդր Սիրունյանը պատրաստակամություն հայտնեց կողմերին «բարիշեցնելու» համար միջնորդությունն ինքն անել: Դատավորը նկատեց. «Արձանագրենք, որ Սիրունյանը քաջ է»:
Տուժող Պարույր Հայրիկյանն ասաց, թե ինքն այն տպավորությունն է ստանում, թե հանցագործություն, նման բան տեղի չի ունեցել: Իսկ պաշտպանի արարքը որակեց «արատավոր քարոզչություն»` հանցագործությունը պարտակելու համար:
Դատարանն այս անգամ չհեռացավ խորհրդակցական սենյակ, այլ որոշեց բավարարել Ալեքսանդր Սիրունյանի միջնորդությունը, դատակոչելով փորձագետներին:
Հիշեցնենք, որ Լյուդվիգ Ավետիսյանի վեց միջնորդությունների ժամանակ դատավորը չորս անգամ մտավ խորհրդակցական սենյակ, մեկ անգամ դատարանում քննեց, եւ ըստ էության մերժեց կենսաբանական, դատահոգեբանական-դատահոգեբուժական համալիր, ապրանաքագիտական, քննչական փորձարարություն անցկացնելու միջնորդությունները:
Այսօրվա դատական նիստին հետեւում էր Ազգային Միացյալ Կուսակցության հիմնադիրներից, Մոսկվայում հանիրավի գնդակահարված Ստեփան Զատիկյանի որդին` Վրեժը:
Լուսանկարում աջից առաջինը՝ Ստեփան Զատիկյանի որդին:
Ռուզան ՄԻՆԱՍՅԱՆ
