Քիչ առաջ Մաշտոցի պուրակում 150 դրամ ուղեվարձին դեմ պայքարող քաղաքացիական ակտիվիստները կազմեցին իրենց առաջիկա պայքարի պլանը:
Նրանց վերահսկում էր ոստիկանությունը՝ Վալերի Օսիպյանի գլխավորությամբ:
Ակտիվիստները ոգեւորված էին իրենց հաջողությամբ՝ «Ժողովուրդ, էսօր կրկնակի շատ ենք, վաղն ավելի ենք շատանալու, սրանք արդեն հանձնվում են: Տարածքը քիչ-քիչ փոքր է դառնում, ավելի լավ է այն, ինչ անում ենք Մաշտոցի պուրակում, տեղափոխենք Ազատության հրապարակ»:
Հնչեցին հետագա ծրագրերի հետ կապված ամենատարբեր առաջարկներն ու գաղափարները՝ սկսած շարժման լոգոյի մշակումից մինչեւ քաղաքացիական հանրաքվեի կազմակերպումը. «Առաջարկում ենք հարցը դնել հանրաքվեի, նախ էս հարցը կլուծվի, ամբողջական կարծիքը կունենանք, երկրորդը՝ PR-ի հարցն էլ կլուծվի: Բացի այդ, ցույց կտան, թե ոնց կարելի է ազատ, արդար ընտրություններ անցկացնել Հայաստանում»:
Կարդացեք նաև
Երիտասարդներից մեկն առաջարկեց բացել սեփական երթուղայինի գծերը եւ սպասարկել ժողովրդին՝ այնպես, ինչպես Հայկոն է անում, Ալեն Սիմոնյանն ու Նիկոլ Փաշինյանը: Մեքենաների հարցն էլ, ըստ նրանց, կարելի է լուծել մի փոքր գումար հավաքելով եւ արդեն դուրս գրված մեքենաները նորից գիծ բերելով:
Կոչ արեցին ակցիայի ժամանակ ցանկացած բախման դեպքում զանգահարել ՄԻՊ-ի գրասենյակներ՝ 116:
Ակտիվիստներից մեկի՝ Աննայի խոսքերով՝ «Այն համակարգը, որ հիմա կա, պարզապես կազմակերպված հանցավորություն է՝ գծատերերի համակարգ, հարկ չվճարելու համակարգ, որեւէ տեսակի ժամանակակից մեթոդ չկիրառելու համակարգ: Խնդիրը որակյալ սպասարկում ունենալն է, արժանապատիվ աշխատանք՝ վարորդների համար»:
Ակցիայի մասնակիցներից մեկն էլ հավաքվածներին զգուշացրեց, որ այս օրերին 150 դրամ ուղեվարձի դեմ տարբեր «կեղծ» խմբեր են ձեւավորվել, որոնք իրենց շարժումը ցրելու նպատակ ունեն. «Երիտասարդ համալսարանականների միավորում կա, խնդրում եմ այդ խմբին չմիանալ, որովհետեւ շատ հնարավոր է այդ խմբից եղան մարդիկ, որոնք ժողովրդին ցրեցին այսօր, մի կողմ տարան»:
Հռիփսիմե ՋԵԲԵՋՅԱՆ
