Վրաստանում իշխանությունները ընդունել են, որ լրատվամիջոցները, որպես անկախ հանրային ինստիտուտ են
«Վերջին ամիսների ընթացքում Հայաստանի լրատվամիջոցների վերաբերյալ շատ բացասական էմոցիաներ չեն եղել: Չենք կարող ասել, որ լրագրողներին շատ են ծեծել, վերջերս հեռուստաընկերություններ չեն փակվում, սեփականության առումով նույնպես, սկանդալային իրավիճակներ չկան»,-համեմատելով Ուկրաինայի եւ Հայաստանի ԶԼՄ-ների ազատության ինդեքսը, որտեղ Հայաստանը Ուկրաինայից առաջատար դիրքերում է, ասաց Երեւանի մամուլի ակումբի (ԵՄԱ)նախագահ Բորիս Նավասարդյանը:
Այսօր «Մարիոթ Արմենիա» հյուրանոցում, պարոն Նավասարդյանը ներկայացրեց 6 երկրներում` Հայաստանում, Վրաստանում, Ադրբեջանում, Մոլդովայում, Ուկրաինայում եւ Բելառուսում իրավիճակը մամուլում, որն արտահայտված էր Արեւելյան գործընկերության երկրների ԶԼՄ-ների ազատության ինդեքսի տեսքով:
Հետազոտությունը կատարվել է Եվրամիության կողմից ֆինանսավորվող «Արեւելյան գործընկերության երկրների ԶԼՄ-ների ազատության դիտարկում» ծրագրի շրջանակներում, որն իրականացվել է ԵՄԱ-ի եւ «Ինտերնյուս-Ուկրաինայի» կողմից:
Կարդացեք նաև
ԵՄԱ ներկայացուցիչ Միքայել Զոլյանի խոսքերով, մեդիա ոլորտի փորձագետների համար պատրաստված հարցերը, որոնց պատասխաններից էլ ձեւավորվել է ինդեքսը, 4 բաժիններից է բաղկացած` քաղաքականություն, գործնական կիրառում, ռադիո եւ հեռուստատեսություն, ինտերնետ եւ նոր մեդիա: Չորս վարկանիշով էլ առաջատարը Վրաստանն է, ապա Մոլդովան, 3-րդ տեղում Հայաստանն է, հետո Ուկրաինան, Ադրբեջանը եւ վերջին տեղում` Բելառուսը:
Բորիս Նավասարդյանի խոսքերով, խոսքի ազատության առումով Վրաստանը մոտեցել է միջին եվրոպական երկրներին. «Վրաստանի այսօրվա իշխանությունները չեն տեսնում լրատվամիջոցները՝ որպես իրենց շահերը հետապնդողի: Ընդունել են լրատվամիջոցներին, որպես անկախ հանրային ինստիտուտ: Մոլդովայում հակառակ գործընթացներ են տեղի ունենում, երբ կոմունիստների իշխանությունը տապալվել էր եւ եվրոպական ուղղվածության ուժերն են եկել իշխանության, բավականին դրական երեւույթներ նկատվեցին, բայց ինչպես երեւում է փորձագետների կարծիքներից, նույնիսկ այս իշխանությունները լրատվամիջոցների մեջ տեսնում են գործիք` քաղաքական հարցերը լուծելու համար»: Պարոն Նավասարդյանի մեկնաբանությունները Մոլդովայում եւ Արեւելյան գործընկերության մյուս երկրներում խոսքի ազատության առումով, առավել մանրամասն` տեսանյութում.
Ըստ միջոցառման կազմակերպիչների, այս ծրագրի նպատակն է պաշտպանել խոսքի եւ արտահայտման ազատությունը Արեւելյան գործընկերության երկրներում` բարձրացնելով տեղեկացվածությունը տարածաշրջանում: Ըստ պարոն Նավասարդյանի, 6 երկրներից 5-ը Եվրոպայի խորհրդի անդամ են եւ միայն Բելառուսն է, որ անդամ չէ: Ծրագրի շրջանակներում ստեղծվել է https://mediafreedomwatch.org կայքը, որտեղ զետեղված են այս հետազոտության արդյունքները, նաեւ՝ մամուլի ազատության եւ լրագրողների իրավունքներին առնչվող տեղեկատվություն:
Լուսինե ԲՈՒԴԱՂՅԱՆ
