Սեպտեմբերի 14-ին Վրաստանի Մառնեուլիի շրջանի Թեքալի գյուղում կայացած հանդիպման ժամանակ քաղաքագետ Զարդուշտ Ալիզադեին ասացինք՝ Սերժ Սարգսյանը հայտարարել է, որ Հայաստանը մտնելու է Մաքսային միության մեջ, հնարավո՞ր է արդյոք, որ Ադրբեջանը միանա այդ միությանը: Ադրբեջանի հայտնի քաղաքագետն ասաց. «Նախ՝ Հայաստանի որոշումը վերջնական չէ, թե ի՞նչ է եվրասիական տնտեսական ընկերակցությունը՝ ոչ ոք չգիտի: Արեւմտաեվրոպական քաղաքական մի վերլուծաբան ասել է՝ Հայաստանը ինչպե՞ս կարող է մտնել մի միության մեջ, որը գտնվում է քայքայման գործընթացի մեջ: Մինչեւ Ադրբեջանում նավթը չվերջանա, այն ոչ մի միության չի միանա, որպեսզի ոչ մեկը փայ չմտնի»:
-Իսկ ե՞րբ կվերջանա ադրբեջանական նավթը:
-10 տարի հետո:
-Կավարտվի՞, թե՞ կնվազի:
Կարդացեք նաև
-Չէ, իսկապես կավարտվի այն իմաստով, որ ադրբեջանական իշխանության ախորժակն աճում է, շուտով նրանք ավելի շատ պարտքեր են վերցնելու, քան մենք ստանալու ենք նավթից ու գազից: Մենք նավթային ֆոնդից վերցնում ենք 2017 թվականի չափաբաժնից, իսկ հիմա 2013 թվականն է: Մենք առաջ ենք վազում: Թեեւ դա կոչվում է ապագա սերունդների հիմնադրամ, ի՞նչ կապ ունեն ապագա սերունդները, եթե ներկա սերունդն է թալանվում: Եվ ընդհանրապես՝ Հայաստանի անդամակցությունը մաքսային միությանը եւ հիպոթետիկ եվրասիական ընկերակցությանն անլուրջ է, եվրասիական միությունը դատարկ մտահղացում է: Պուտինը դա ընդունել է, որպեսզի բավարարի ռուս բնակիչների հավակնությունները, որպեսզի ինքը թալանի Ռուսաստանը:
Հայաստանի համար այդ միությանը միանալու մեջ ոչ մի սարսափելի բան չկա: Բացականչություններ են լսվում՝ օ՜, մենք, կորցրել ենք մեր ինքնիշխանությունը, ինքնիշխանությունը վաղուց կորսվել է եւ բարեկեցությունն ավարտվել է: Իսկ Ադրբեջանը չի միանալու Մաքսային միությանը եւ ոչ մի այլ միության, մենք ինքնաբավ ենք եւ ինքներս ունակ ենք թալանելու:
Ոսկան ՍԱՐԳՍՅԱՆ
