Այսօր Շիրակի մարզի ընդհանուր իրավասության դատարանում շարունակվեց ՀՀ աշխատանքի և սոցիալական հարցերի նախարարության սոցիալական ապահովության պետական ծառայության վճարումների ծառայության Գյումրու տարածքային ստորաբաժանման մի քանի պաշտոնյաների ու աշխատակիցների դեմ հարուցված քրեական գործի քննությունը:
Նրանք մեղադրվում են կեղծ փաստաթղթեր սարքելու, պետությունից առանձնապես խոշոր չափի գումար հափշտակելու, ընդհանուր 87.222.364 դրամի կենսաթոշակի, թաղման, նպաստի և ժառանգվող գումարներ յուրացնելու մեջ: Այսօր ամբաստանյալների հարցաքննություն էր նշանակված, հրապարակվեց սոցիալական ապահովության պետական ծառայության վճարումների ծառայության Գյումրու տարածքային ստորաբաժանման պետ Էդուարդ Վարժապետյանի նախաքննական ցուցմունքը, որտեղ նա մանրամասներ էր պատմում իր ու Վազգեն Խաչիկյանի փողային հարցերից:
Ըստ Էդուարդ Վարժապետյանի, 2010 թվականի մայիս-հունիս ամիսներին Վազգեն Խաչիկյանը հանձնարարել է իրեն վերցնել վճարումների ծառայության Գյումրու տարածքային ստորաբաժանման պատասխանատու Ռուբեն Մնացականյանին ու գլխավոր մասնագետ Արթուր Աբրահամյանին ու շտապ գնալ Երևան` իր մոտ: Նրանք գնացել են, որտեղ և խորհրդակցություն է տեղի ունեցել: Այնտեղ եղել են վճարային ցուցակները, ու Վազգեն Խաչիկյանը տեղեկացրել է, որ 29 միլիոն դրամ ավել գումար է վճարվել, Արթուրին փաստերով հաստատել է, որ վերջինս խախտում է կատարել:
Այնուհետ Վազգեն Խաչիկյանը հանձնարարել է այդ գումարը անպայման վերականգնել ու ամեն օր զանգահարել, անհանգստացրել է: Ըստ Էդուարդ Վարժապետյանի, Ռուբեն Մնացականյանը 20 միլիոն դրամ է ճարել, որը ինքը, ցելոֆանից տոպրակի մեջ փաթաթելով, տարել, տվել է Վազգեն Խաչիկյանին ու ասել է` «Արթուրը հազիվ հավաքեց»:
Կարդացեք նաև
Շուրջ 10 օրում 20 միլիոն են հավաքագրել, 2-րդ անգամ էլ 9-ը միլիոնը: Առաջին անգամ Էդուարդ Վարժապետյանը գումարը անձամբ Խաչիկյանին է տվել, երկրորդ անգամ`նրա տեղակալին`Աշոտ Աբրահամյանին: «Դրանից հետո մեկ տարի է անցել ու ես Խաչիկյանին չեմ տեսել, չգիտեմ վերականգնել է 29 միլիոնը, թե ոչ, գնացեք իրենից հարցրեք», – գրել էր Գյումրու տարածքային ստորաբաժանման նախկին պետը:
Մանրամասները` վաղվա «Առավոտ» օրաթերթում:
Նունե ԱՐԵՎՇԱՏՅԱՆ
