26-ամյա Լիանան արդեն չորս տարի է, ինչ հակաբեղնավորիչներից կիրառում է ներարգանդային պարույրը: Առաջին անգամ ծննդաբերել է 6 տարի առաջ: Առաջիկա մեկ տարվա ընթացքում չի պատրաստվում մայրանալ. «Ես շատ դժվարությամբ եմ ծննդաբերել, խնդիրներ կային կազմվածքիս պատճառով: Տղաս էլ շատ չարաճճի փոքրիկ դարձավ, հազիվ եմ հասցնում նրա ետևից: Այժմ 5 տարեկան է: Նախատեսում եմ երկրորդ երեխայիս ունենալ ամենաշուտը երկու տարի հետո, որ գոնե տղաս մի քիչ խելոքանա, իսկ ես ֆիզիկապես կարողանամ երկուսի մասին էլ հոգ տանել»,-ասում է նա:
Հղիությունից խուսափելու, աբորտների չդիմելու համար խորհուրդ է տրվում օգտագործել հակաբեղնավորիչներ, սակայն դրանք բոլորն էլ 100% արդյունավետ և հուսալի չեն: Մանկաբարձ-գինեկոլոգ Անահիտ Անանյանի խոսքով՝ գոյություն ունեն հակաբեղնավորիչների տարբեր տեսակներ: Դրանք լինում են դեղահաբերի, ներարգանդային պարույրի տեսքով, ինչպես նաև՝ պահպանակներ, անավարտ սեռական հարաբերություններ, կնոջ արգանդափողերի ստերլիզացիա (վերջինս վիրահատական միջամտություն է պահանջում և անդառնալի է. այդ միջոցին դիմելու դեպքում կինը այլևս հղիանալու հնարավորոււթյուն չի ունենում) և այլ: Անահիտ Անանյանը նշում է՝ հետագայում խնդիրներից խուսափելու համար շատ կարևոր է հակաբեղնավորիչների ընտրությունը. «Կողմնորոշվելու համար, թե ինչ հակաբեղնավորիչ օգտագործել, նախ և առաջ կինը պետք է դիմի գինեկոլոգի, անցնի համապատասխան հետազոտություններ և ինդիվիդուալ ընտրի հակաբեղնավորիչը, քանի որ ինչպես բոլոր դեղամիջոցները, այնպես էլ հակաբեղնավորիչները ունեն հակացուցումներ, որոնք լինում բացարձակ և հարաբերական »,-ասում է նա:
Գինեկոլոգի խոսքով` հակաբեղնավորիչների պարագայում բացարձակ հակացուցումներն են թրոմբոէմբոլիկ հիվանդությունները, սիրտ-անոթային և գլխուղեղի ծանր հիվանդությունները, լյարդի ֆունկցիայի ախտահարումը, կաթնագեղձի և սեռական օրգանների չարորակ նորագոյացությունները, շաքարային դիաբետի ծանր ձևերը, անհատական անտանելիությունը: Իսկ հարաբերական ցուցումներն են ծխախոտամոլությունը, հիպերտենզիան, վարիկոզ հիվանդությունը, Էպիլեպսիան, միգրենը, կնոջ անամնեզում հղիության հիպերտենզիան, լեղապարկի, լյարդի, երիկանների քրոնիկական հիվանդությունները, նաև այն հանգամանքբը, որ կնոջ տարիքը 40-ից բարձր է: Սակայն, ինչպես նշում է գինեկոլոգը, դա վերաբերում է միայն հորմոնալ հակաբեղնավորիչներին: Իսկ ինչ վերաբերում է անավարտ սեռական հարաբերություններին, գինեկոլոգը նշում է. «Դա խիստ հակաֆիզիոլոգիական է և ծանր է անդրադառնում թե՛ կնոջ, թե՛ տղամարդու առողջության վրա »:
Կարդացեք նաև
Անահիտ Անանյանի խոսքով՝ ամենատարածված հակաբեղնավորիչները պահպանակն է և ներարգանդային պարույրը (спираль), որը ներդրվում է արգանդ. «Դա խոչնդոտում է ձվաբջջի բեղնավորմանը, կամ բեղնավորված ձվաբջջի թափանցմանը և ներդրմանը արգանդի լորձաթաղանթ: Սա նույնպես ունի իր հակացուցումները: Չի կարելի կիրառել սեռական օրգանների սուր և ենթասուր բորբոքային հիվանդությունների դեպքում, դաշտանային ցիկլի խանգարումների դեպքում, նաև արգանդի զարգացման արատների, նեղուց-պարանոցային անբավարության դեպքում»,-ասում է նա: «Կուզեի նաև նշել, որ այս ամենից բացի՝ հորմոնալ հակաբեղնավորիչները ունեն նաև բուժական և կանխարգելիչ ազդեցություն, ինչպես նաև իջեցնում են սեռական օրգանների մի շարք հիվանդությունների առաջացման հավանականությունը, ինչպիսիք են՝ բորբոքային հիվանդությունները, ձվարանների բարորակ և չարորակ նորագոյաթյունները արգանդի միոմա քաղցկեղը, կաթնագեղձի բարորակ նորագոյաթությունները»,-հավելում է մանկաբարձ-գինեկոլոգը:
Հարցին, թե ըստ նրա, հակաբեղնավորիչների կիրառումը ևս կարող է նպաստել նրան, որ ծնելիության ցուցանիշը զգալիորեն նվազի, Անահիտ Անանյանը պատասխանում է. «Հակաբեղնավորիչների օգտագործումը նպաստում է աբորտների թվի պակասին, բայց ոչ ծննելիության, քանի որ ներկայումս ցանկացած կին պլանավորում է իր հղիությունը»:
Նազենի Բաղդասարյան
Հ.Գ. Այսօր հակաբեղնավորման համաշխարհային օրն է: Տոնն ընդունվել է 2007 թվականին վերարտադրողական առողջության հարցերով զբաղվող մի շարք կազմակերպությունների նախաձեռնությամբ: Օրվա նպատակը չպլանավորված հղիության խնդիրներին մեծ ուշադրություն հրավիրելն է, ինչպես նաև նվազեցնել դրանց թիվը:
