Այսօր Ստրասբուրգում մեկնարկեց ԵԽԽՎ աշնանային նստաշրջանը: Քիչ առաջ ԵԽ նախարարների կոմիտեի նախագահ, ՀՀ արտգործնախարար Էդվարդ Նալբանդյանը լիագումար նստաշրջանի շրջանակում ամփոփեց Հայաստանի նախագահության վեց ամիսները ԵԽ նախարարների կոմիտեում, որը ստանձնել էր Անդորրայից հետո:
Այնուհետեւ ԵԽԽՎ պատվիրակները հարցեր հղեցին Էդվարդ Նալբանդյանին: Հարցեր հնչեցին Սիրիայում տիրող իրավիճակի վերաբերյալ, Հունգարիայում խոսքի ազատության, ԵԽ անդամ երկրների միջեւ միջկառավարական համագործակցության մեխանիզմների բարելավման մասին:
Պատվիրակները բարձրացրին նաեւ Հայաստանի եւ Ադրբեջանի միջեւ գոյություն ունեցող ԼՂ հակամարտության խնդիրը: Պատասխանելով պատվիրակների հարցերին` պարոն Նալբանդյանը նշեց. «Հակամարտության կարգավորման հարցում ՀՀ-ի եւ Ադրբեջանի մոտեցումները տարբերվում են: Հայաստանի դիրքորոշումը մեկ գծի վրա է միջազգային հանրության եւ եռանախագահների (ՌԴ, ԱՄՆ, Ֆրանսիա) դիտարկումների հետ, սակայն Ադրբեջանի դիրքորոշումը այլ է, ինչ եռանախագահների առաջարկած սկզբունքները: Այնինչ Հայաստանի ղեկավարությունը պատրաստ է գնալ հիմնախնդրի լուծման միայն այն ճանապարհով, որը համահունչ է միջազգային հանրության դիրքորոշումներին: Այդ հիմնադրույթները մանրամասնորեն ներկայացրել է նաեւ Մինսկի խումբը: Ուստի, եթե ադրբեջանական կողմը համաձայնի միջազգային հանրության չափանիշների համապատասխան լուծման, միայն այդ դեպքում հնարավոր կլինի ակնկալել հակամարտության խաղաղ կարգավորում»:
Կարդացեք նաև
Տաթեւ ՀԱՐՈՒԹՅՈՒՆՅԱՆ
