Այսօր Շիրակի մարզի ընդհանուր իրավասության դատարանում սկսվեց Գյումրու «Ռուբին» ոսկերչական սրահը թալանելու փորձ արած երկու փորձառու ոստիկանների` ոստիկանության Մուշ բաժնի քրեական հետախուզության բաժանմունքի պետի տեղակալ Հրաչ Քալաշյանի և նույն բաժնի օպերլիազոր Արտակ Բադալյանի դեմ հարուցված քրեական գործ քննությունը:
«Հրաչ Քալաշյանը մեղադրվում է այն բանում, որ նա, ուրիշի գույքի առանձնապես խոշոր չափերի գաղտնի հափշտակություն կատարելու նպատակով նախնական համաձայնության գալով ոստիկանության Մուշ բաժնի քրեական հետախուզության բաժանմունքի օպերլիազորի` Արտակ Բադալյանի հետ, նախապես իրենց հետ վերցնելով դիմակավորված գողություն կատարելու համար հարմարեցված սպորտային գլխարկներ, մուրճ, կացին և ձեռնոցներ 2013 թվականի օգոստոսի 5-ին ժամը 04.10 սահմաններում գնացել են Խաղաղության օղակ 8 հասցեում գտնվող «Ռուբին» ոսկերչական սրահ, կոտրել են սրահի մուտքի դռնակի ապակիները, մտել ներս, այնինչ իրենցից անկախ հանգամանքներում հանցավոր մտադրությունն ավարտին չեն հասցրել:Նկատելով տարածքում ծառայությունն իրականացնող ոստիկանության տարբերանշանով ավտոմեքենա` դիմել են փախուստի, սակայն բռնվել են ոստիկանության աշխատակիցների կողմից և բերման ենթարկվել», -ընթերցում ենք քրեական գործում:
Այսօր հանրային պաշտպան Արամայիս Հայրապետյանը միջնորդեց փոխել Հրաչ Քալաշյանի խափանման միջոցը, 700 հազար դրամ գրավի դիմաց ազատ արձակել նրան, քանի որ նրա մայրը ծանր հիվանդ է , բուժվում է մայրաքաղաքում, բացի այդ երկու ոստիկաններն էլ սոցիալական ծանր վիճակում են գտնվում, չեն կարող անգամ պաշտպան վարձել, հանրային պաշտպանն է իրականացնում նրանց պաշտպանությունը:Սակայն դատախազ Վաղարշակ Մխիթարյանը առարկեց` նշելով, որ նա կխոչընդոտի դատական նիստերի ընթացքը: «Ռուբին» ոսկերչական սրահի սեփականատերն էլ հայտարարեց, որ ոչ առարկում է, ոչ էլ համաձայնում, այլ թողնում է դատարանի հայեցողությանը: Դատարանը հեռացավ խորհրդակցական սենյակ` որոշում կայացնելու, այն կհրապարակի վաղը:
Կարդացեք նաև
Նունե ԱՐԵՎՇԱՏՅԱՆ
