Դեռեւս հունիսի 28-ին մի շարք կապանցիներ նախաձեռնող խմբի աջակցությամբ դիմել են ՀՀ վարչական դատարան՝ Կապան քաղաքային համայնքի ավագանու 2013 թվականի հունիսի յոթի «Համայնքի սեփականություն հանդիսացող գույքը՝ ջրամատակարարման և ջրահեռացման համակարգերը, անհատույց օգտագործման իրավունքով «Հայջրմուղկոյուղի» ՓԲ ընկերությանը տրամադրելու մասին» որոշումը առ ոչինչ ճանաչելու պահանջով:
Դատաքննությունն արդեն ավարտվել է, իսկ նոյեմբերի 4-ին կլինի վճռի հրապարակումը: Նշենք, որ Կապանում ստեղծված նախաձեռնող խմբի անդամները անընդունելի են համարել, որ համայնքային իշխանությունը, ավագանին առանց կապանցիների կարծիքը հաշվի առնելու համակարգի սպասարկումը որոշել են 25 տարի ժամկետով տրամադրել «Հայջրմուղկոյուղի» ՓԲ ընկերությանը, որի գործունեության վերաբերյալ կապանցիները պարբերաբար իրենց դժգոհությունն են արտահայտել: Կապանում նաեւ ստորագրահավաք էր անցկացվել եւ մոտ 11 հազար բնակիչ ավագանու այդ որոշմանը դեմ էր արտահայտվել:
Դատարան դիմած հայցվորների ներկայացուցիչ, փաստաբան Էդգար Հովհաննիսյանը կարծում է, որ դատարան ներկայացված փաստերն ավելի քան բավարար են, որպեսզի հայցը բավարարվի: «Մերժելու դեպքում կգնահատենք ու կվերլուծենք հիմքերը եւ որոշում կկայացնենք բողոքարկելու կամ խնդրին մեկ այլ եղանակով մոտենալու հարցը: Չնայած, այն փաստերը, որ դատարան են ներկայացված, մեզ այլ բան են հուշում: Թեեւ, կարծում եմ, եթե հայցը մերժվի, ապա կարող է միայն ձեւական տեսանկյունից լինել, քանի որ բովանդակային առումով hիմք չենք տեսնում մերժելու: Սակայն, անկախ ամեն ինչից չենք կորցնում լավատեսությունը եւ սպասում ենք արդար վճռի», -ասաց Էդգար Հովհաննիսյանը: Նշենք, որ նախաձեռնող խումբը եւ Կապանի քաղաքապետարանը փորձում են խնդրին կառուցողական տեսանկյունից մոտենալ եւ գտնել հարցի կարգավորման այնպիսի տարբերակ, որն ի նպաստ համայնքի կլինի:
Կարդացեք նաև
Մերի ՍՈՂՈՄՈՆՅԱՆ
