Ռուս ուղղափառ եկեղեցու Սարատովի թեմի հոգևորական Վարդապետ Ղազարը, վերջերս «Հափշտակություն ռոք երաժշտությամբ» իր նյութում խոսելով երաժշտական ուղղվածության մասին, քրիստոնյայի հոգու համար չափազանց կործանարար է համարել ջազ, ռոք, պանկ, դիսկո երաժշտությունը, քանի որ, ըստ քահանայի, «երաժշտական մշակույթի այս ձևերը չեն սահմանափակվում միայն արվեստի բնագավառով»:
«Հենց ռոք-ըն-ռոլլի երևան գալը արևմուտքում ընկալվեց որպես երիտասարդների սեքսուալ հեղափոխության սկիզբ: Ամբողջ ճանապարհը, որով անցել և անցնում է այս կործանարար «մշակույթը», ահռելի թվով երիտասարդների կարճ ճանապարհով տանում է դեպի խավար դժոխք, ծածկված է ամենանողկալի, ամենասարսափելի մահացու մեղքերի խայտառակությամբ. դա բազմապիսի պոռնկական այլանդակություններն են, սիրո լիարժեք «ազատությունը», այսինքն` ամոթի մերժում, ամեն տեսակի ստոր կրքերի ու ցանկությունների լիակատար սանձարձակություն, դա թմրամոլությունն է, որը հաճախ բերում է ամենասարսափելի հետևանքների, չափազանց բարձ դոզաներից լինում են մահացության, բռնության, ինքնասպանության դեպքեր»,- կարծում է քահանան:
Երեկ Գյումրիում հայտնի ջազմեն Արմեն Թութունջյանը` Չիկոն, անդրադառնալով հոգևորականի այս խիստ գնահատականին, նախ լրագրողներից հետաքրքրվեց, թե ով է այդպիսի ելույթ տվող քահանան ու հակադարձեց նրան. «Ժողովուրդ, դուք տեղյա՞կ եք` ո՞վ է եղել էդ ելույթ ունեցող քահանան, ես տեղյակ չէի , երեկ ինձ զանգ տվեցին, ես չկարողացա գնալ էդ հարցազրույցին… Ինչ-որ մի քահանա ելույթ է ունեցել` շատ սաստիկ բացասական արտահայտվելով ռոքի հասցեին, ջազն էլ է կցել, որ դա դեմ է մեր մենթալիտետին, որովհետև էդտեղ սատանայական նյութեր կան: Ես ուզում եմ ասեմ, որ այդպիսի բան չի կարող լինել. ջազը դա բարություն է, նաև սեր է ու բարձր բարոյականություն»:
Նունե ԱՐԵՎՇԱՏՅԱՆ
Կարդացեք նաև
Ճիշտ է հոգևորականը