Նոյեմբերի 25–ը կանանց նկատմամբ բռնության դեմ պայքարի միջազգային օրն է։ Այդ առիթով այսօր երթ էին կազմակերպել կանանց իրավունքներով զբաղվող կազմակերպությունները, որոնք կոչ էին անում չլռել բռնության ենթարկվելու մասին, քանի որ լռության հետեւանքով բռնության ենթարկվող կանանց թիվը ավելի է մեծանում։
Երթի մասնակիցների պնդմամբ՝ այսօր Հայստանում կանանց 25% – ը ենթարկվում է բռնության, արձանագրվել են նաեւ մահվան դեպքեր, որոնց պատճառով այսօր 12 երեխա մնացել են առանց մայրական խնամքի։
Ինչպես Aravot.am-ի թղթակցի հետ զրույցում նշեց «Կանանց ռեսուսային կենտրոն» հասարակական կազմակերպության հասարակայնության հետ կապերի պատասխանատու Էլվիրա Մելիքսեթյանը՝ եթե մինչ այս տարի երթին մասնակցել է միայն իրենց կազմակերպությունը, ապա այս տարի իրենց են միացել նաեւ շատ այլ կազմակերպություններ, որոնք պայքարում են կանանց իրավուքների համար։ Է. Մելիքսեթյանը նշեց նաեւ, որ այս տարի թեժ գիծ զանգերը զգալիորեն ավելացել են, ինչը , ըստ նրա, վկայում է այն մասին, որ կանաք սկսում են բարձրաձայնել իրենց դեմ կատարված բռնության մասին՝ չվախենալով հասարակության արձագանքից։
Այս փաստը հաստատեց նաեւ ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը՝ այսօր ՄԱԿ–ի հայաստանյան գրասենյակում կայացած մամուլի ասուլիսի ժամանակ։ Նա նշեց, որ բռնության մասին լռելու կարծրատիպը տարեց տարի նվազում է, հավելեց նաև, որ այդ բնագավառում դեռ անելիքներ շատ կան, այս մասին վկայում է այն փաստը, որ կանանց բռնության մասին հարցմանն մասնակցած բոլոր կանայք նշել էին գոնե մեկ պատճառ, որի համար ամուսինն իրավունք ունի իրենց ապտակելու։ Ինչ վերաբերվում է կանանց բռնության դեմ պայքարի միջազգային օրվան՝ Գ. Հայրապետյանն նշեց, որ իրենք նախատեսել են 16 օրյա ծրագիր, որի ժամանակ ցուցադրվելու են ֆիլմեր, լինելու են ներկայացումներ և այլ միջոցառումներ, որոնք ավարտվելու են դեկտեմբերի 10–ին՝ մարդու իրավունքների պաշտպանության օրը։Հայաստանում ՄԱԿ–ի մշտական համակարգող եւ ՄԱԿ–ի զարգացման ծրագրի մշտական ներկայացուցիչ Բրեդլի Բուզետտոն նշում է, որ այս խնդիրը չի վերաբերվում միայն Հայաստանին, այն արդիական է աշխարհի շատ երկրներում։ Վիճակագրական տվյալները ցույց են տալիս , որ աշխարհում ամեն 10 կնոջից 3–ը ենթարկվում են բռնության, որոնք տարբեր բնույթ են կրում՝ հոգեբանական, սեռական, ֆինանսական։ Կան երկրներ, որտեղ ամեն 10 կնոջից 7-ն է ենթարկվում բռնության։ Ըստ Բ. Բուզետտոյի՝ Հայաստանում այժմ ակտվորեն տարվում են աշխատանքներ կանանց և տղամարդկանց միջև լիարժեք սեռային հավասարության հասնելու համար։
Զառա ԱՍԿԱՐՅԱՆ
Կարդացեք նաև
