Ինչպես Aravot.am-ին փոխանցեց Գյումրու Ավստրիական «Մոր և մանկան» հիվանդանոցի մանկաբարձագինեկոլոգիական բաժանմունքի կալանավորված 36-ամյա բժիշկ-գինեկոլոգ Վահագն Մադոյանի փաստաբան Թամարա Յայլոյանը, քիչ առաջ Արթիկ քրեակատարողական հիմնարկից ազատ են արձակել բժշկին:
Այսօր Շիրակի մարզի ընդհանուր իրավասության դատարանը` Էդուարդ Մանուկյանի նախագահությամբ, ժամը 15.00-ի սահմաններում քննել է բժշկի խափանման միջոցը փոխելու հարցը ու որոշել է նրան ազատ արձակել` 1 միլիոն դրամ գրավի դիմաց:
Հիշեցնենք, որ բժիշկ-գինեկոլոգին նախնական կալանքի տակ վերցնելու պատճառը եղել էր իր իսկ բակում քաղաքացիական հագուստ կրած ոստիկանների հետ վիճաբանությունը: Նախնական վարկածով, մոտ 20 օր առաջ բժիշկը երեկոյան ժամը 10.30 սահմաններում իր տան դիմաց կանգնեցրած մեքենան փորձել էր մտցնել ավտոտնակ: Այդ ժամին քաղաքացիական հագուստ կրած երկու ոստիկաններ, որոնք, ի դեպ, ծառայողական մեքենայով չեն եղել, կանգնեցրել են նրան` պնդելով, որ ճանապարհային երթևեկության կանոնների խախտում է կատարում, որից և բախում էր առաջացել բժշկի ու ոստիկանների միջև: Բանը հասել էր նրան, որ բժշկին տեղափոխել էին ոստիկանության բաժին, նրա դեմ քրեական գործ հարուցել ՀՀ Քրեական օրենսգրքի 316 հոդվածի 1-ին մասով` իշխանության ներկայացուցչին դիմադրություն ցույց տալու մեղադրանքով ու կալանավորել էին:
Թամարա Յայոլյանը մեզ նաև փոխանցեց, որ դատական նիստից հետո իր պաշտպանյալին դարձյալ տեղափոխել են Արթիկ քրեակատարողական հիմնարկ, մինչև որ նրա հարազատները վճարել էր 1 միլիոն դրամի գրավը:
Կարդացեք նաև
Քիչ առաջ բժշկին Արթիկ քրեակատարողականից տուն են տեղափոխել: Մեր այն հարցին, թե ի՞նչը պատճառ հանդիսացավ դատարանի համար, որ փոխեր բժիշկ-գինեկոլոգի խափանման միջոցը`արդյո՞ք նրա բժիշկ լինելը և հիվանդանոցում գերծանրաբեռնված ռեժիմով աշխատելը, Թամարա Յայլոյանն ասաց. «Հասարակության մեջ կարծիք կա, որ շատ քիչ է կիրառվում այլընտրանքային խափանման միջոցը, կարծում եմ Վահագն Մադոյանի խափանման միջոցը փոխելու պատճառներից մեկը սա է, և անխոս դատարանը հաշվի առավ նաև իր պաշտպանյալի մասնագիտությունը: Նաև դերակատարություն ունեցան ԶԼՄ-ները»: Բժշկի դեմ հարուցված քրեական գործի նախաքննությունը դեռ ընթանում է:
Նունե ԱՐԵՎՇԱՏՅԱՆ
