Այսօր Հայաստանում Խորհրդային Միության հաստատման 93-ամյակն է:
Հայաստանում Խորհրդային կարգերի հաստատման 93-ամյակի կապակցությամբ այսօր Հայաստանի կոմունիստական կուսակցության Վանաձորի քաղաքային կոմիտեի առաջին քարտուղար Անդրանիկ Ղուկասյանը մամուլի ասուլիս էր հրավիրել:
Անդրադարձ կատարվեց Խորհրդային Միության 70 տարիների ընթացքում Հայաստանում տեղի ունեցած դրական տեղաշարժերին, Հայաստանի հաջողություններին:
«Մենք իսկապես 1920 թվականից մինչեւ 90-ականները ունեցել ենք լուրջ հաջողություններ, քանի որ լրիվ հակառակ հասարակարգն է եղել այդ ժամանակ` սոցիալիստականը: Այդ ընթացքում ունեցել ենք նորմալ հարաբերություններ այդ միության բոլոր հանրապետությունների հետ, նրանց հետ կապված ենք եղել առեւտրով, տնտեսապես, առողջապահության, կրթական ոլորտներով»,-ասաց Անդրանիկ Ղուկասյանը:
Կարդացեք նաև
Նա նկատեց, որ գոյություն ունեցող այն կարծիքը, թե ԽՍՀՄ-ն երկաթե վարագույրով է պատված եղել, այդքան էլ իրականությանը չի համապատասխանում:
«Ասում են, որ երկաթյա վարագույրով է փակված եղել Խորհրդային Միությունը, ոչ ոք չի կարողացել ուրիշ երկրներ գնալ, իրականում դա այդպես չէ: Երկաթյա վարագույրը նրա համար էր, որ ամեն մի եվրոպական այլանդակություն չներմուծվեր միություն»,-նշեց Անդրանիկ Ղուկասյանը` հավելելով, որ Հայաստանի` Մաքսային Միության կազմի մեջ մտնելով երկրում ինչ-որ չափով կվերածնվի Խորհրդային կարգերին հատուկ բարեկեցությունը, եւ ժողովուրդը կկարողանա անվտանգ ու տնտեսապես ապահով պայմաններում ապրել:
«Մաքսային Միությանն անդամակցելն ինչ-որ չափով հնարավորություն կտա վերագտնել Խորհրդային տարիների բարեկեցությունը»,-եզրափակեց նա:
Անուշ ԲՈՒԼՂԱԴԱՐՅԱՆ
