«Իմ կարծիքով` մամուլը երբեք այսքան ոչ ազդեցիկ ու անուժ չի եղել»,-այսօր հայտարարեց «Կենտրոն» հեռուստաընկերության մեկնաբան Արմեն Դուլյանը: Նա հիշեցրեց. «Առաջներում առաջին նախագահը ջարդում էր տասը ԶԼՄ-ներ, երկրորդը` փակում էր այն ԶԼՄ-ները, որոնք դուր չէին գալիս իրեն: Հիմա պարզապես ոչ մեկն այդ ասածը բանի տեղ չի դնում: Իմ կարծիքով` մենք բոլորովին էլ իշխանություն չենք, քանի որ, եթե գրում ես այն մասին, որ քո գլխավոր դատարանի դատավորը մի քանի բնակարան է գնել և ոչ մեկը դրան չի արձագանքում՝ դու այլևս իշխանություն չես»:
«Հրապարակ» օրաթերթի գլխավոր խմբագիր Արմինե Օհանյանը հակադարձեց. «Սա խոսում է այն մասին, որ հեռուստատեսությունում աշխատող լրագրողի և մամուլում աշխատողի ազդեցությունն ու տպավորությունները էականորեն տարբերվում են: Որևէ օր չկա, որ մեր գոնե մեկ հրապարակման արդյունքում մի փոքրիկ բան չփոխվի: Նույն վճռաբեկ դատարանի օրինակը` մի կասկածեք, որ այս տեսակ հրապարակումներն ունենում են իրենց հետևանքը, կարող է դա րոպեական չէ, բայց գոնե մի քանի ամիս հետո տեսնում ենք, որ այսպիսի հրապարակում է եղել և երեք ամիս հետո նրան հանում են աշխատանքից»:
«Անդին» ամսագրի հիմնադիր, հրապարակախոս Մերուժան Տեր-Գուլանյանն այս կապակցությամբ ասաց. «Արդյոք մամուլով ու հեռուստաընկերություններով ինչ քննարկվում է, լո՞ւրջ է ուսումնասիրվում, թե՞ պատվեր է կատարվում: Հաճախ մենք էլ արդար չենք, մեր անձնական խնդիրներն ու կողմնորոշումներն ունենք»:
Արմինե Օհանյանը վրդովվեց. «Մամուլի ներկայացուցիչը պիտի նման հայտարարություններ չանի, եթե նման բան եք ասում, ուրեմն այդ պատվերը կատարել եք»:
Կարդացեք նաև
Արմեն Դուլյանի համար անընդունելի է այն, որ մամուլը անձնական հարցեր է բարձրացնում. «Եթե ուզում ենք, որ քաղաքացիական հասարակությունը կայանա, ապա անձնական հարցերով համապատասխան մարմինները զբաղվեն` ոստիկանությունը, դատախազությունը: Իմ կարծիքով` չորրորդ իշխանությունը պիտի լինի չորրորդ իշխանություն, ոչ թե զբաղվի ինչ-որ մարդկանց անձնական հարցերը լուծելով»:
Արմինե Օհանյանը հակադարձեց. «Այդպես չէ, երբ մամուլը անդրադառնում է կոնկրետ խնդրի, համապատասխան ատյաններում ավելի լուրջ ու պատասխանատվությամբ են վերաբերվում հարցին: Ուստի ավելի լավ է մի մոմ վառես, քան ամբողջ օրը հայհոյես այդ խավարը»:
Արմեն Դուլյանը խոսքն ամփոփեց հուսահատական նոտայով. «Երբ արտասահմանից եկա, բավականին լավատես էի, բայց հիմա զգում եմ, որ ոչ մի բան այստեղ չի փոխվի: Իշխանությունը գրավել են մի խումբ մարդիկ, որոնք բացի իրենց սեփական շահից` ոչնչով չեն հետաքրքրվում: Որևէ լավ բան ապագայում չեմ կարող կանխատեսել` կապված այս իշխանությունների հետ»:
Տաթև ՀԱՐՈՒԹՅՈՒՆՅԱՆ
