Մեկ տարուց ավելի է, ինչ փոքրիկ Մարիամիկի ծնողները պայքարում են, թե երեխան ծնողներից որ մեկի հետ պետք է ապրի: 1-ամյա Մարիամիկի ծնվելուց հետո նրա մոր՝ Մելինե Գրիգորյանի մոտ հետծննդյան փսիխոզ էր առաջացել, նա որոշ ժամանակ բուժում է ստացել Սյունիքի մարզային նյարդահոգեբուժական դիսպանսերում: Այդ ընթացքում նրա նորածին դստեր խնամքը «հանձնել էին» ամուսնու՝ Սարգիս Ղոնյանի ընտանիքին: Հետծննդյան փսիխոզը Գեղանուշ գյուղում բնակվող ամուսինների բաժանման պատճառ դարձավ. Սարգիսը, ինչպես մեզ հետ զրույցում պատմեց Մելինեն, իրեն չէր այցելում, չէր հետաքրքրվում առողջությամբ: Մելինեի տառապանքներին գումարվել էր եւս մեկը՝ «զրկվել էր» դստեր հետ ապրելու հնարավորությունից. շաբաթվա մեջ 1-2 անգամ այցելում էր ամուսնու բնակարան ու մի քանի ժամով շփվում երեխայի հետ: Կազդուրվելուց հետո էլ ամուսինը չէր ցանկանում Մարիամիկին տալ մոր խնամքին՝ պատճառաբանելով, թե կինն ի վիճակի չէ երեխային «տիրություն» անել: Իսկ փոքրիկ Մարիամիկը, ինչպես Մելինեն պատմեց, մոր հետ տեսակցելուց, զբոսնելուց ու շփվելուց հետո ամեն անգամ մորը հրաժեշտ տալիս ժամերով լաց էր լինում. «Փեշիցս չէր պոկվում, ինձ բաց չէր թողնում»:
Մոր եւ 1-ամյա դստեր այս տանջանքները մեկ տարուց ավելի ձգձգվեցին: Մելինե Գրիգորյանը դիմել էր դատարան` պահանջելով երեխայի խնամքն իրեն տալ:
Մենք 26.09.2013 թվականի` «Մեկ տարեկան Մարիամիկը օրերով մորը չի տեսնում» հրապարակմամբ անդրադարձել էինք այս խնդրին: Դեռ նախորդ տարի էր դատարանը դատահոգեբանական եւ դատահոգեբուժական փորձաքննություններ նշանակել, որից հետո դատական գործընթացը պետք է վերսկսվեր ու վերջնական վճիռ կայացվեր: Նախորդ տարվա հոկտեմբերի 9-ին վերջապես փորձաքննություններն իրականացվեցին, բայց մինչ եզրակացությունը տրվեր եւ դրա հիման վրա դատարանը որոշում կայացներ, Մելինեի տանջանքներն ու սպասումները բազմապատկվել էին, եւ միայն հույսը, որ դստեր հետ ապրելու հնարավորություն կունենա, փոքր-ինչ մեղմացնում էր մոր վիճակը:
Նախորդ տարվա դեկտեմբերի 27-ին Սյունիքի մարզի ընդհանուր իրավասության դատարանը որոշեց, թե որտեղ պետք է բնակվի փոքրիկ Մարիամիկը, ըստ դատավճռի` Մարիամ Սարգիսի Ղոնյանի բնակությանը վայրը որոշել մոր` Մելինե Գրիգորյանի բնակության վայրում:
Հիմա Մելինե Գրիգորյանը, ինչպես ինքն ասաց` ամենաերջանիկ մայրն է. աշխատելու մտադրություն չունի. «Հլը կարոտս առնեմ երեխայիցս, չեմ ուզում մի վայրկյան բաժանվեմ իրանից»:
Վերջերս էլ Մարիամիկի հայրը՝ Սարգիս Ղոնյանը, այցելել էր դստերը: Մելինեի մոր` տիկին Մելանյայի պատմելով` «Եկել էր ասում էր՝ երեխուն տվեք, տանեմ մի քիչ պահեմ, բայց չտվեցինք, հազիվ ենք տուն բերել: Ասացի՝ մեր բարեկամներն ամեն օր գալիս են երեխային տեսնելու, թող մի որոշ ժամանակ անցնի, կգաս կտեսնես, կտանես: Մի քիչ ջղայնացավ, բայց հետո ոնց որ թե հասկացավ ու թողեց գնաց»:
Երեխայից նորից բաժանվելու վտանգ Մելինեն չի զգում, կարծում է, որ ամուսինը դժվար թե դիմի Վերաքննիչ դատարան` բողոքարկելու: Իսկ ներկայումս ամուսնալուծության հայցն է դատարանում, որի վճռից հետո էլ վերջնականապես պարզ կլինի, թե հայրը ինչ պայմաններով կկարողանա տեսակցել դստեր հետ:
«Հիմա ես շատ լավ եմ, լրիվ առողջ եմ ինձ զգում, մեկ-մեկ գնում եմ բժշկիս մոտ` խորհրդակցելու, իրեն տեսնելու, բայց ընդհանուր ես լավ եմ. ոնց կարամ վատ լինեմ, եթե Մարիամիկս հետս է»:
ՆԵԼԼԻ ԲԱԲԱՅԱՆ
Հ. Գ. Եթե դուք ականատես եք եղել ընտանեկան բռնության դեպքի, ահազանգեք Արագ արձագանքման խմբին
«Առավոտ» օրաթերթ
