Օրեր առաջ «Դեմ եմ» նախաձեռնության անդամ քաղաքագետ Դավիթ Մանուկյանը հայտարարեց, թե նախաձեռնությունը ահազանգեր է ստացել մի շարք կազմակերպությունների աշխատակիցներից, որոնք դժգոհում են, թե իրենց ստիպում են ընտրել կենսաթոշակային ֆոնդեր, ինչի իրավունքը գործատուն չունի, քանի որ ՍԴ որոշումը կասեցրել է կենսաթոշակային բարեփոխումների մասին օրենքը` այդ կետով: Այդ կազմակերպությունների թվում են մի շարք հանրակրթական դպրոցներ, մանկապարտեզներ, այդ կազմակերպություններից են «Արմսվիսբանկը», «Հայաստանի էլեկտրական ցանցերը», «Գարանտ ինշուրանսը»:
Aravot.am-ը նշված կազմակերպություններից պարզաբանումներ ստացավ տարածված ահազանգերի վերաբերյալ:
«Հայաստանի էլեկտրական ցանցեր» ընկերության հասարակայնության և ԶԼՄ-ների հետ կապերի դեպարտամենտի պետ Նատալյա Սարջանյանը նշեց, որ իրենց մոտ ճնշումներ չեն իրականացվում ու փոխանցեց հետևյալը. «Առաջին անգամ եմ լսում նման բան, որ մարդկանց ասեն, առավել ևս ստիպեն, թե ընտրեք ֆոնդեր: Նման բան չկա: Այս պահին ոչինչ չի պահվում, քանի որ օրենքը կասեցված է: Ֆոնդերի հետ կապված օրենքը դեռ կասեցված է, ինչի՞ մասին է խոսքը»:
Aravot.am-ը նույն խնդրի վերաբերյալ գրավոր հարցում է ուղարկել նաև ԿԳ նախարարություն: Գերատեսչությունից մեզ տեղեկացրին, որ շուտով կպատասխանեն:
Կարդացեք նաև
«Արմսվիսբանկից» ստացանք հետևյալ գրավոր պատասխանը. « Ի պատասխան Ձեր հարցման հայտնում ենք, որ այս անգամ ևս հավատարիմ մնալով իր սկզբունքներին «Արմսվիսբանկ» ՓԲԸ-ն դրսևորելու է քաղաքական չեզոքություն՝ «Կուտակային կենսաթոշակների մասին» ՀՀ օրենքի և դրա կիրառման հարցերի շուրջ: Բանկն իր գործունեության ընթացքում ղեկավարվելու է միայն ՀՀ օրենսդրության պահանջներով: Ցանկանում ենք միաժամանակ տեղեկացնել, որ «Արմսվիսբանկ» ՓԲԸ-ն իր աշխատակիցներին փոխհատուցելու է «Կուտակային կենսաթոշակների մասին» ՀՀ օրենքով սահմանված պարտադիր վճարներ կատարելու արդյունքում աշխատակիցների զուտ աշխատավարձից նվազած գումարները:
Տաթև ՀԱՐՈՒԹՅՈՒՆՅԱՆ
