Ինչպես տեղեկացրել ենք`Շիրակի մարզի Ազատան համայնքի տղամարդկանց մեծ մասին «Զվարթնոց» օդանակավակայանից չէին թույլատրել մեկնել Յակուտսկ, որտեղ ազատանցիները մեծ գործեր են անում, օրինականորեն հաստատված են այնտեղ, քաղաքը կենտրոնացրել են իրենց ձեռքում:
Հենց այս գյուղի բնակիչներից շատերին էլ չէին թույլատրել մեկնել նաև Մոսկվա, ու այս ամենը կատարել էին առանց հիմնավոր պատճառաբանության` խորհուրդ տալով դիմել Հայաստանում ՌԴ դեսպանատուն:
Հիմա էլ Aravot.am-ը խոպանչիներից ահազանգ ստացավ առ այն, որ ուղևորափոխադրումներ իրականացնող ռուսական ընկերությունը կրճատել է անգամ Գյումրիի «Շիրակ» օդանավակայանից Մոսկվա թռչող չվերթների թիվը` շաբաթական 3-ից դարձնելով 1 անգամ: Այսօր առավոտյան դեպի Մոսկվա չվերթն արդեն իրականացվել է:
Շատերը համոզված են, որ այս ամենը կապված է Սոչիում սկսված ձմեռային օլիմպիական խաղերի հետ, և ՌԴ-ն ավելորդ զգուշավորություն է ցուցաբերում այլազգիների նկատմամբ:
Կարդացեք նաև
Մենք այս թեմայով պարզաբանումներ խնդրեցինք Գյումրի-Մոսկվա չվերթներ իրականացնող «Վիմավիա» ու «Ուրալավիա» ընկերությունների Գյումրիի ներկայացուցիչ Դավիթ Հայրապետյանից, որն ասաց, թե պետք չէ հավատալ ժողովրդի մեջ տարածված խոսակցություններին՝ այդ ամենը կապված է ուղևորների թվաքանակի նվազման հետ: «Թող համապատասխան թվով ուղևորներ լինեն, ամեն օր էլ չվերթներ կլինեն: Ամեն տարի այս սեզոնին նույն վիճակն է, ակտիվ շրջան չէ, ուղևորների թվաքանակը նվազում է»,- ասաց Դավիթ Հայրապետյանը` տեղեկացնելով նաև, որ շաբաթական երկու անգամ է չվերթ իրականացվում: Վերջինս նաև հույս հայտնեց, որ մոտ երկու շաբաթից չվերթների քանակը կավելանա:
Նունե ԱՐԵՎՇԱՏՅԱՆ
