Առաջիկայում Վանաձորը ճգնաժամային կառավարման կենտրոն կունենա:
Այդ մասին, այսօր Լոռու մարզպետարանում հրավիրված աշխատանքային խորհրդակցության ժամանակ ասաց ՀՀ արտակարգ իրավիճակների նախարար Արմեն Երիցյանը:
Նախարարը նշեց, որ կենտրոնը ստեղծելու համար արդեն ձեռք են բերվել անհրաժեշտ բոլոր սարքավորումները:
«Մենք պետք է դա ունենանք, այսօր առանց ճգնաժամային կառավարման կենտրոնի հնարավոր չէ, առանց 9-11 ծառայության դժվար է»,-նշեց նախարար Արմեն Երիցյանը` տեղեկացնելով, որ կենտրոնում կաշխատեն նաեւ հաշմանդամություն ունեցող անձինք:
Կարդացեք նաև
Նա նկատեց, որ աշխատելու են այնպիսի ծառայություն մատուցել, որ յուրաքանչյուր քաղաքացի, զանգելով 9-11, գոհ մնա:
«Մենք պետք է ունենանք հզոր ծառայություն»:
Լոռու մարզպետ Արթուր Նալբանդյանը եւս կարեւորեց մարզում ճգնաժամային կառավարման կենտրոնի ստեղծման անհրաժեշտությունը:
«Ճգնաժամային կառավարման կենտրոն ստեղծելն, իրոք, առաջնային հարց է, քանի որ Լոռու մարզը արտակարգ իրավիճակներով հարուստ մարզ է, նաեւ սեյսմիկ ուժեղ գոտի է»,-եզրափակեց Լոռու մարզպետը:
Անուշ ԲՈՒԼՂԱԴԱՐՅԱՆ
