Սպառողների միության նախագահ Արմեն Պողոսյանն այսօր «Երկու երես» մամուլի ակումբում ներկայացրեց «ՀայՌուսգազարդի» շրջիկ լաբորատորիա իրականացրած գազի կալորիականության չափաբաժնի ստուգման արդյունքները: Ստուգումներն իրականացրել էին հունվարի 17-ին՝ «ՀայՌուսգազարդում» գազի կալորիականության վերաբերյալ քննարկումից անմիջապես հետո:
Պարոն Պողոսյանը պատմեց, որ ստուգումներ իրականացվել են պատահականության սկզբունքով ընտրված բնակարանում, Դավիթաշեն վարչական շրջանում: «Լաբորատոր փորձաքննությունը ցույց է տվել, որ այդ վայրում գազի կալորիականությունը եղել է 8200 կկալ, այսինքն՝ նորմայի սահմաններում: Այսկերպ իմ կասկածներն այն մասին, որ գազի կալորիականությունն արհեստականորեն իջեցվում է, փարատվում են: Սակայն քանի դեռ բողոքները ժողովրդի կողմից շարունակվում են, հարցը այսպես չի կարելի թողնել»,- ասաց նա:
Սակայն պարոն Պողոսյանը մնում է այն կարծիքին, որ չի կարելի սահմանափակվել միայն Հայաստանի տարածքում ստուգումներ իրականացնելով. «Անհրաժեշտ է գազը բալոնի մեջ տեղափոխել արտերկիր՝ ավելի հավաստի ցուցանիշներ ստանալու համար: Սակայն դրա համար չկան բավարար միջոցներ, իսկ «ՀայՌուսգազարդը» հրաժարվում է տրամադրել գումար»:
Չնայած այն հանգամանքին, որ պարոն Պողոսյանն ասում է, թե իր կասկածները փարատվել են, նա կարծում է, որ անգամ չնչին կեղծման դեպքում սխալ ցուցանիշ տված լաբորատորիայի դեմ դատարան հայց կներկայացվի:
Կարդացեք նաև
Էլյա ՀՈՎՀԱՆՆԻՍՅԱՆ
