Այսօր մայրաքաղաքի «Դինամո» մարզադահլիճում մեկնարկեց բռնցքամարտի Հայաստանի առաջնությունը:
Հանրապետության գրեթե բոլոր մարզերի եւ Արցախի ավելի քան 90 բռնցքամարտիկներ պայքարն սկսել են 10 քաշային կարգերում չեմպիոններին եւ մեդալակիրներին որոշելու համար:
Հայաստանի բռնցքամարտի ֆեդերացիայի նախագահ, ԱԺ պատգամավոր Արթուր Գեւորգյանն Aravot.am-ի հետ զրույցի սկզբում շնորհավորեց բոլոր բռնցքամարտիկներին, մարզիչներին, երկրպագուներին եւ բոլոր կազմակերպիչներին` առաջնության մեկնարկի առնչությամբ եւ մասնակիցներին մաղթեց ազնիվ ու թեժ մրցակցություն: «Այսօրվանից բռնցքամարտիկները պայքարելու են ազգային հավաքականում իրենց տեղն ունենալու համար: Մասնակցում են գրեթե բոլոր մարզերը: Ճիշտ է, կան մարզեր, որոնք քիչ թվով բռնցքամարտիկներ են գործուղել, իսկ Արցախից մասնակցելու է ընդամենը մեկ մարզիկ: Ընդհանուր առմամբ հանրապետության առաջնությանը մասնակցում է շուրջ 95 մարզիկ, ինչը շատ ցածր թիվ է: Մտահոգիչ է այն փաստը, որ մեր հիմնական` ցածր քաշային կարգերում, ունենք ընդամենը 3-4 բռնցքամարտիկ: Սա աբսուրդ է: Ժամանակին ու միշտ էլ այդ քաշային կարգում ունեցել ենք միջազգային մակարդակի լիդերներ: Մեդալների համար պայքարում էին մինչեւ 16 մարզիկներ եւ նրանցից առնվազն 3-4-ը հավակնում էին առաջին տեղին: Այսօր մրցակցություն որպես այդպիսին չկա: Իսկ եթե չկա մրցակցություն, աճը շատ բարդ է ու դժվար: Պետք է հետեւություն անել եւ մանկապատանեկան մարզադպրոցներում հստակեցնել աշխատանքը: Ո՞ւ են մարզադպրոցների այն սաները, որոնք այսօր պետք է մասնակցեին Հայաստանի առաջնությանը»:
Արթուր Գեւորգյանը տեղեկացրեց, որ հավաքականի համար կկազմակերպեն տարվա պլանով նախատեսված ուսումնամարզական հավաքները, բռնցքամարտիկները կմասնակցեն միջազգային եւ ընկերական հանդիպումների, քանի որ այս տարի մեծահասակների համար չկա ոչ աշխարհի առաջնություն, ոչ Եվրոպայի: Ֆեդերացիայի նախագահը նաեւ նշեց, որ առաջնության արդյունքներով հավաքական ընդգրկված բռնցքամարտիկների հանդեպ յուրովի մոտեցում է ցուցաբերվելու, քանի որ նրանք արդեն կլինեն ազգային հավաքականի անդամներ:
Կարդացեք նաև
Աշոտ ՀԱԿՈԲՅԱՆ
