Armenia Today կայքի համակարգող Արգիշտի Կիվիրյանի բողոքի քննությունն այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում հետաձգվեց: ՀՔԾ քննիչ Լյովա Մելքոնյանը դատարանին գրավոր տեղեկացրել էր, որ հիվանդության պատճառով չի կարողանա ներկայանալ եւ խնդրել էր հետաձգել դատական նիստը:
«Վերջին մեկ շաբաթվա մեջ, իմ դեմ հարուցված գործերն անընդհատ հետաձգվում են: Նախորդ գործով տուժող ոստիկանն էր հիվանդացել, հաջորդ օրը, իմ դեմ վարչական գործով ՀՀ ոստիկանությունը, անհասկանալի պատճառներով, չէր ստացել հակընդդեմ հայցը, հիմա վատառողջ է ՀՔԾ քննիչը: Սա թույլ է տալիս ինձ մտածել, որ գործ ունենք միտումնավոր գործերը հետաձգելու հետ»,- առարկեց Արգիշտի Կիվիրյանը:
Նրա պաշտպան Երվանդ Վարոսյանն էլ ասաց՝ դատարանի հայեցողությանն են թողնում նիստը հետաձգել-չհետաձգելու որոշումը:
Նրա մեկ այլ պաշտպան Լուսինե Սահակյանն էլ շարունակեց. «Միտումնավոր ձգձգումների հետ գործ ունենք, մի քանի գործով միանգամից հետաձգումներ: Մեր կարծիքով, մեր բողոքն ու նյութերը բավարար են, որ գործը քննվի, եւ քննիչն այս նյութերից դուրս ոչինչ չի կարող ասել: Մեզ համար շատ հետաքրքիր է, թե քննիչն ինչ է ասելու այս նյութերի հետ կապված»:
Կարդացեք նաև
Դատավոր Մակեյանի խոսքով, քանի որ բողոքի քննությունը սկսել են քննիչ Լյովա Մելքոնյանի ներկայությամբ, ապա դատարանը գտնում է, որ նիստը պետք է հետաձգվի, որովհետեւ նախորդ նիստին քննիչը ժամանակ է խնդրել, որ ելույթով հանդես գա:
Հաջորդ դատական նիստը նշանակվեց մարտի 19-ին:
Հիշեցնենք, որ պարոն Կիվիրյանը բողոքարկում է Կոմիտաս 5-ում իր դեմ ոստիկանների ապօրինի գործողությունների փաստով քրեական գործ հարուցելու մասին իր դիմումը մերժելու ՀՔԾ քննիչի որոշումը:
Արփինե ՍԻՄՈՆՅԱՆ