Պատրիցիա Կասը Երեւանում է: Նա երեկ համերգ ունեցավ՝ «Կասը երգում է Պիաֆ» խորագրով, իսկ այսօր ՀՀ արտգործնախարարությունում հանդիպեց լրագրողների հետ: Նրա համերգը Ֆրանկոֆոնիական միջոցառումների համատեքստում էր:
«Շատ երկար ժամանակ ուզում էի երգել Հայաստանում, ուրախ եմ, որ իրականություն դարձավ: Ջերմ, զգացմունքային ընդունելության արժանացա: Իմ սպասելիքները միանգամայն արդարացան: Հույս ունեմ դարձյալ ինչ-որ առիթով կվերադառնամ Հայաստան»,-նշեց սիրված երգչուհին:
«Մեծ երջանկություն է Ֆրանկոֆոնիայի երկամսյակը մեկնարկել Պատրիցիա Կասի համերգով»,-նշեց ՀՀ-ում Ֆրանսիայի դեսպան Անրի Ռենոն: Հավելեց, որ Պատրիցիա Կասի լեզուն ֆրանսերենն է, որը ոչ միայն մտքի, այլեւ սրտի լեզու է:
Պատրիցիա Կասը 1988-ին հայտնի դարձավ հատկապես իր «Մադմուազելը երգում է բլյուզ» ալբոմից հետո: Իսկ ընդհանրապես նա մոր շնորհիվ, որը հսկայական դեր է ունեցել իր արտիստական կարիերայում, 8 տարեկանից երգել է Սիլվի Վարդանի, Դալիդայի, Միրեյ Մաթիեյի երգերը:
Կարդացեք նաև
«Ես Ձեզ հետ կիսեցի իմ սերը՝ ֆրանսիական երգի հանդեպ, դա հարգանքի տուրք էր էդիթ Պիաֆ լեգենդին: Գիտեմ, որ նա իմ կարիքը չունի, ապրում է երաժշտասերների սրտում: Իսկ ինչու Էդիթ Պիաֆ, որովհետեւ համերգը նրա մահվան հիսնամյա տարելիցին հարգանքի տուրք էր: Նաեւ այն երգացանկը ներկայացրի, որը ինձ վրա էլ է մեծ տպավորություն թողել: Ինձ համար նորույթ էր՝ Էդիթ Պիաֆի երգացանկին զուգահեռ, ներառեցի իմ երգացանկից երգեր: Ուրախ էի նաեւ բացահայտել Հայաստանը, ուրախ եմ, որ հանդիսատեսը գոհ մնաց»,-ասաց երգչուհին:
Պատասխանելով հարցին՝ ինչն է միավորում իրեն ու Պիաֆին իբրեւ մարդ եւ երգչուհի, Պատրիցիա Կաը հայտնեց. «Ես ուզում էի ուղղակի հարգանքի տուրք մատուցել մեծ երգչուհուն, չէի ուզում պատճենել Պիաֆին: Դրա համար ծանոթացել եմ նրա հարցազրույցներին, կյանքի դրվագներին, որպեսզի զգամ կերպարը ու ճիշտ մատուցեմ: Որոշակի ժեստեր էլ կրկնօրինակեցի Պիաֆից, բայց չեմ պատճենել, իրեն այդպես զգացել եմ: Ուղղակի երգել եմ սրտով»:
Երգչուհին նշեց. «Ես միշտ փափուկ խաղալիք արջուկ եմ ինձ հետ տանում, որը մայրիկիս տված խաղալիքն է, այն ինձ համար կարեւոր իր է, էներգիայի փոխանցման աղբյուր է եւ շատ թանկ հուշ»:
Ասուլիսից անմիջապես հետո Պատրիցիա Կասը եւ նրա անձնակազմը հյուրընկալվեցին Երեւանի կոնյակի գործարանում: Կասը դիտեց հայկական կոնյակագործությունը ներկայացնող անիմացիոն տեսանյութ: Մի պահ պատվիրակությունը կանգ առավ «Խաղաղության տակառի» մոտ, որը ստեղծվել է 2001թ ի պատիվ ԵԱՀԿ Մինսկի խմբի համանախագահների այցի: Տակառում հնեցվում է զինադադարի տարին խորհրդանշող 1994թ. ապիրտ: Տակառը կբացվի այն ժամանակ, երբ կարգավորվի Ղարաբաղյան հակամարտությունը:
Կոնյակի գործարանում Պատրիցիա Կասը նվեր ստացավ սահմանափակ խմբաքանակով թողարկված կոնյակ եւ գրառումներ կատարեց հուշագրքում:
Հավելենք, որ Պատրիցիա Կասի այցը եւ համերգը հնարավոր դարձան Երեւանյան հեռանկարներ փառատոնի, ՀՀ ԱԳ եւ մշակույթի նախարարությունների, ՀՀ-ում Ֆրանսիայի դեսպանատան, Երեւանի Կոնյակի գործարանի շնորհիվ:
Գոհար ՀԱԿՈԲՅԱՆ
