«Կյանքի խոսք» կրոնական կազմակերպության առաջնորդ Ուիլ Ֆեքմանը մարտի 9-ին պաշտոնապես հայտարարեց , որ դառնում է Կաթոլիկ եկեղեցու հետևորդ: Այս թեմայի շուրջ «Տեսակետ» մամուլի ակումբում ասուլիսի ժամանակ խոսեց «Քայքայիչ պաշտամունքներից տուժածների օգնության և վերականգնողական կենտրոնի» ղեկավար Ալեքսանդր Ամարյանը:
Իր խոսքերով, եթե առաջնորդը գտնում է, որ իրենց ճանապարհն այդքան ճիշտ չէ, որքան կաթոլիկներինը, և տեղափոխվել է, ապա Հայաստանում գործող «Կյանքի խոսք» եկեղեցին պարտավոր է լուծարվել: «Մոտ ժամանակներս, կարող է ունենանք մի գործոն, որը դառնա կրոնական կառույցի ինքնալուծարման գործընթաց»,- ասաց պրն Ամարյանը:
Կենտրոնի ղեկավարն անդրադարձավ նաև Ավետարանչական եկեղեցուն, որոնք այժմ փորձում են ազատվել անցյալ տարվա աղմուկից. «Ավետարանական եկեղեցին և Հայ ավետարանչական ընկերակցությունն երկու կրոնական կառույցներ են, սակայն մեկ գլխով: Մեկը մյուսին օգտագործում է ի շահ իրեն»: Այժմ Ավետարանական եկեղեցու հետևորդները իրենց իսկ եկեղեցու հետ դատական գործընթացի մեջ են աշխատանքային օրենսդրության խախտումների պատճառով: Դա էր 16 հոգու ապօրինաբար աշխատանքից ազատելը:
Վերջերս Մոսկովյան-Մաշտոց խաչմերուկում կարող էինք նկատել կրպակներ, որտեղ «Եհովայի վկաներ» կրոնական կազմակերպության հետևորդները վաճառում էին իրենց գրականությունը: «Այս դեպքին ականատես է լինում լրագրողներից մեկը, կանչում է ոստիկանին, որն էլ ասում է, որ նրանք իրավունք ունեն նման քայլեր անելու: Սակայն մեր ոստիկանությունը Խղճի ազատության մասին օրենքը չգիտի: Այնտեղ հստակ նշված է, որ բացի իրենց տարածքից, իրենք իրավունք չունեն քարոզչություն անելու քաղաքի այլ վայրերում»,- ասաց Ալեքսանդր Ամարյանը:
Կարդացեք նաև
Այն, ինչ վերաբերում է «Կյանքի խոսք» կրոնական կազմակերպությանը, պրն Ամարյանը նշեց, որ հնարավոր է ՝ դրա փոխարեն ավելանան այլ կրոնական կազմակերպությունները:
Լիլիթ ՀԱՐՈՒԹՅՈՒՆՅԱՆ
