Մերձդնեստրի չճանաչված հանրապետության խորհրդարանի նախագահ Միխայիլ Բուրլան նամակով դիմել է Պետդումայի խոսնակ Սերգեյ Նարիշկինին՝ խնդրելով վերանայել ռուսական օրենսդրությունը և հնարավորություն ստեղծել, որ Մերձդնեստրը միանա Ռուսաստանին: Հայտնում է «Վեդոմոստի» թերթը:
Բուրլան հիշատակել է, որ Ռուսաստանը հեշտացրել է այլ երկրների տարածքները իրեն միացնելու կարգը, սակայն նշել, որ դա օգնում է միայն Ղրիմին միանալ ՌԴ-ին, քանի որ Մոլդովայի իշխանություններին չես կարող միանշանակ անարդյունավետ որակել:
Նա խնդրել է վերանայել նոր օրինագիծը, ըստ որի, եթե երկրում բացակայում է «արդյունավետ օրինական իշխանությունը», ապա առանց այդ պետության թույլտվությունը ստանալու՝ հանրաքվեով կամ տեղի իշխանությունների դիմումի հիման վրա այլ երկրի մաս կազմող տարածքը կարող է միանալ Ռուսաստանին:
Բացի այդ, Բուրլան նշել է, որ այդպիսով Մերձդնեստրը պետք է Մոլդովայի օրենքներով անցկացնի հանրաքվեն, սակայն չճանաչված պետությունն իր օրենքներն ունի: Եվ վերջին կետով խոսնակը նշել է, որ Մերձդնեստրում չեն գործում Մոլդովայի իշխանական մարմինները, որոնք կարող են Ռուսաստանին դիմել միանալու խնդրանքով:
Կարդացեք նաև
Բուրլան իր մտավախությունն է հայտնել, որ Մերձդնեստրի վիճակը էլ ավելի կվատանա, երբ Մոլդովան ստորագրի ԵՄ Ասոցացման պայմանագիրը ու տնտեսական սահմանափակումներ մտցնի:
Պատրաստեց Հովհաննես ԻՇԽԱՆՅԱՆԸ
