Ավելորդ է խոսել դդումի օգտակարության մասին: Վիտամիններն ու այլ օգտակար միկրոէլեմենտներն այս բանջարեղենի (կամ ոմանց պնդմամբ՝ հատապտղի) մեջ այնքան շատ են, որ ուղղակի անհրաժեշտ է այդ էժան, բայց՝ համեղ եւ օգտակար պտուղն օգտագործել որքան հնարավոր է շատ: Այս անգամ եկեք պատրաստենք թավշի նման փափուկ եւ նուրբ համ ունեցող այս ապուր-պյուրեն:
Անհրաժեշտ մթերքները
Դդում- 0,8-1 կգ (սուպերմարկետներից կարող եք գնել արդեն կորիզահան արած եւ ձեր ուզած չափով կտրած դդում)
Սոխ- մեկ գլուխ
Սխտոր- 2-3 պճեղ
Գազար-1-2 հատ
Մի փոքր կտոր կոճապղպեղ (имбирь) (պարտադիր չէ)
Կարդացեք նաև
Դդմի սերմեր
Կարագ
քերած պարմեզան կամ որեւէ պինդ, դեղին պանիր
Պատրաստման եղանակը
Դդումը կեղեւահան անել, լվանալ, կտրատել ոչ շատ մանր: Մաքրած գազարի, սոխի եւ սխտորի հետ լցնել կաթսայի մեջ, ավելացնել այնքան ջուր, որ ծածկի բանջարեղենները:
Եփել 10-15 րոպե, 10 րոպեն լրանալուց հետո ըստ ճաշակի աղ անել: Պատառաքաղով ստուգել, եթե հեշտությամբ մտնում է դդումի մեջ, անջատել: Կաթսայի բերանը փակ թողնել, որ մի քիչ սառչի: Լցնել բլենդերի մեջ՝ ավելացնելով այն ջրից, որում եփվել է, լավ խառնել:
Ապուրը պատրաստ է: Այն կարելի է մատուցել վրան կարագի կտոր, քերած պարմեզան եւ դդումի սերմեր լցրած: Շատ համեղ է կարագահացով: Իսկ եթե պահքի մեջ եք, կարելի է ապուրի վրա ուղղակի ձիթապտղի յուղ ավելացնել:
Ապուրը կարող եք պահել կաթսայի մեջ եւ հարկ եղած դեպքում՝ տաքացնել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
