«Դ!եմ եմ» նախաձեռնության անդամ Սրբուհի Ղազարյանն արդեն իսկ Կենտրոն եւ Նորք-Մարաշ ընդհանուր իրավասության դատարան է դիմել` նախկինում «կուտակայինի» մասով իր աշխատավարձից պահված գումարները ետ ստանալու համար: Այսօր այդ մասին նա տեղեկացրեց «Մեդիա կենտրոնում» հրավիրված մամուլի ասուլիսում: Սա առաջին հայցն է: Այն ընդունվել է վարույթ եւ սահմանված ընթացակարգով առաջիկայում կլսվի:
«Դ!եմ եմ» նախաձեռնության անդամներն այսօր «Մեդիա կենտրոնում» անդրադարձան մայիսի 15-ին Ազգային ժողովի ընդունած «Կուտակային կենսաթոշակների մասին» ՀՀ օրենքում փոփոխություն կատարելու մասին ՀՀ օրենքին: Ըստ օրենքի, գործատուները չպետք է կենսաթոշակային պարտադիր պահում կամ փոխանցում կատարեն այն աշխատակիցների համար, ովքեր համակարգին մասնակցելուց հրաժարվելու դիմում են ներկայացրել:
Անդրադառնալով օրենքի ընդունումից հետո ստեղծված իրավիճակին, «Դ!եմ եմ» նախաձեռնության անդամները խոսեցին աշխատակիցների նկատմամբ ճնշումներին: Նախաձեռնության անդամ Սրբուհի Ղազարյանն ասաց, որ իրենք դիմում-բողոքներ ունեն հրաժարվելու դիմումները չընդունելու մասին Բրյուսովի անվան լեզվաբանական համալսարանից, Հերացու անվան բժշկական համալսարանից, Չայկովսու անվան երաժշտական դպրոցից, «Գրանդ տոբակոյից», Նորք-Մարաշ բժշկական կենտրոնից:
Երեւանի մի շարք դպրոցներից եւ այլ հիմնարկներից բողոքների մասին` տեսանյութում
Կարդացեք նաև
Սրբուհի Ղազարյանը նաեւ ներկայացրեց «միջանկյալ» օրենքի որոշ դրույթներ, որոնք, ըստ նախաձեռնության անդամների, իրավական հակասությունների մեջ են ՀՀ քաղդատօրենսգրքի եւ իրավական ակտերի մասին ՀՀ օրենքի հետ:
Բանախոսը կարծում է, որ մինչ այժմ պահված գումարներն անվերապահորեն պետք է վերադարձվեին քաղաքացիներին:
Նելլի ԳՐԻԳՈՐՅԱՆ
