Ռուսաստանի նախագահ Վլադիմիր Պուտինը և Ուկրաինայի նորընտիր նախագահ Պյոտր Պորոշենկոն հունիսի 6-ին հանդիպել են Ֆրանսիայում, հաղորդում է «Ռոյթերս»-ը:
Առաջնորդների հանդիպումը նախաձեռնել էին Ֆրանսիայի նախագահ Ֆրանսուա Օլանդը և Գերմանիայի կանցլեր Անգելա Մերկելը:
Օլանդի աշխատակազմից հայտնել են, որ նրանք սեղմել են միմյանց ձեռքերը և 15 րոպե տևած զրույցում համաձայնության են եկել մի քանի օրից Ուկրաինայում հրադադարի շուրջ բանակցություններ սկսել:
Նրանք նաև քննարկել են Ռուսաստանի կողմից Ուկրաինայի ընտրությունները ճանաչելու և երկու երկրների միջև տնտեսական հարցերը:
Կարդացեք նաև
Ավելի վաղ Պուտինն ու Պորոշենկոն հանդիպել էին Մերկելի ներկայությամբ: Լրատվականի թղթակիցը նշում է, որ այդ կարճ հանդիպման ժամանակ չի նկատել, որ նրանք ձեռք սեղմեին:
Երկրների ղեկավարները Ֆրանսիայում են գտնվում Երկրորդ համաշխարհային պատերազմի ժամանակ Նորմանդիայում դաշնակիցների զորքերի վայրէջքի 70-ամյակին նվիրված տոնակատարություններին մասնակցելու համար: Պորոշենկոյին Օլանդը հրավիրել է որպես իր անձնական հյուր:
Պատրաստեց Հովհաննես ԻՇԽԱՆՅԱՆԸ
