Սոցիոլոգ Ահարոն Ադիբեկյանը, այսօր «Զարկերակ» մամուլի ակումբում անդրադառնալով Հայաստանում արձակուրդների կարեւորությանը, նշեց, որ եթե մարդ լավ է հանգստանում, ապա ավելի լավ սկսում է աշխատել։ Պրն Ադիբեկյանի բերած տվյալների համաձայն՝ Վրաստանում տարեկան հանգստանում է մոտ 150 հազար հայ, 50 հազարը գնում է Թուրքիա, եւս մոտ 150 հազարը հանգստանում է իրենց՝ արտագնա աշխատանքի մեկնած ազգականների մոտ։ Պրն Ադիբեկյանի փոխանցմամբ՝ ընտանիքների ընդամենը 3 տոկոսն է հանգստանում «էլիտար կուրորտներում»։ Ընդհանուր առմամբ հայերի 15 տոկոսն է կարողանում թույլ տալ հանգստի ծախսեր կատարել։
Հայաստանում առողջարանների թիվը, սովետական միության տարիների համեմատ, տասն անգամ անկում է ապրել։ Պրն Ադիբեկյանը նշեց, որ առողջարաններում գները «ֆանտաստիկ կերպով» բարձր են. «Ջերմուկի առողջարանում մեկ ամիս հանգստանալու փոխարեն, ավելի մատչելի է հանգստանալ հարեւան Վրաստանում։ Մեկ օրվա Ջերմուկի առողջարանում հանգստանալու գումարով կարող ենք մեկ շաբաթ հանգստանալ Քոբուլեթիում»։
Հոգեբան Աննա Բադալյանը նշեց, որ հանգստի ժամանակ շատ կարեւոր է հանգստի կազմակերպման ձեւը՝ ակտի՞վ է, թե՝ պասիվ։ Նա տեղեկացրեց, որ հանգիստը շատ օգտակար է աշխատանքից կտրվելու, լիցքաթափվելու համար. « 7 օր հանգիստը բավական է մարդու համար, նոր ուժերով աշխատելու համար»։
Կարդացեք նաև
Էլյա ՀՈՎՀԱՆՆԻՍՅԱՆ
