Արաբկիր եւ Քանաքեռ -Զեյթուն վարչական շրջանների ընդհանուր իրավասության դատարանում Վոլոդյա Ավետիսյանի գործով դատական նիստն այսօր տեղի կունենա առանց ազատամարտիկների մասնակցության: Դատարանը որոշել է արգելել նրանց մասնակցությունը, թեեւ այդ որոշումը նախապես չի հրապարակվել:
Այս պահին ազատամարտիկները դատարանի դիմաց են հավաքվել, նրանք չեն էլ փորձում դատարան մտնել:
Ազատամարտիկ Գագիկ Սարուխանյանը Aravot.am-ին ասաց, որ թեեւ այսօր են իմացել, որ իրենց մուտքն արգելված է, բայց դեռ չորս օր առաջ են իրենք որոշել բոյկոտել դատական նիստը, նրանք նույնիսկ դատավորի վերաբերյալ իրենց բողոք-դիմումն են պատրաստել ու ուղարկելու են արդարադատության խորհուրդ, ՀՀ նախագահին, ԱԺ ոչ իշխանական խմբակցություններին:
«Այս դիմումում նկարագրվում է դատավոր Լեւոն Գալստյանի պահվածքը, նրա վարած դատավարության ոճը: Բացի այն, որ բազմաթիվ օրենքի խախտումներով է վարում դատավարությունը, նա հանդգնում է դատարանը դարձնել փողոցային խոսակցությունների տեղ: Երբ քաղաքացիներից մեկը քմծիծաղեց, թե ինչպես էր դատավորը հուշում դատախազին, նա հարցրեց, թե այդ ով էր քմծիծաղողը եւ պատասխան չստանալով, ասաց՝ այդ ով է պախկվում կնոջ փեշերի տակ: Նա դիտավորյալ սադրեց՝ գիտակցելով, որ իրեն հարգող տղամարդ, մանավանդ ազատամարտիկը պետք է պատասխան տար»,- ասաց պարոն Սարուխանյանը:
Կարդացեք նաև
Նրա խոսքով, իրենք դատական այսօրվա նիստը բոյկոտել են, որ թույլ տան դատարանին անել այն, ինչ ուզում է. «Միեւնույն է՝ մենք գիտենք, որ ամեն ինչ արհեստական ձգում են, շինծու է, բայց մենք թույլ չենք տա արհեստական ձգձգմանը»:
Այս պահին դատական նիստը սկսվել է, այն դռնփակ է, միայն լրագրողների մասնակցությունն է թույլատրված, դատախազ Պապիկյանը ընթերցում է Վոլոդյա Ավետիսյանի եւ գործով վկաների հեռախոսազրույցների արձանագրությունը: Իսկ դատարանի դիմաց հավաքված ազատամարտիկները բողոքի ակցիա են անցկացնում՝ պահանջելով արդարություն, Վոլոդյա Ավետիսյանին ազատ արձակում:
Արփինե ՍԻՄՈՆՅԱՆ
