«Արցախում շատ մեծ դժգոհություն եղավ Աստանայում Սերժ Սարգսյանի պահվածքից եւ ոչ միայն քաղաքական, այլ նաեւ գյուղական, սովորական քաղաքացիների մակարդակով»,- «Երկու երես» մամուլի ակումբում, խոսելով Հայաստանի` Մաքսային միությանն անդամակցելու հեռանկարների, այդ առիթով ընթացող գործընթացների մասին, ասաց «Հայազն» կուսակցության վարչության անդամ Ալեքսանդր Քանանյանը:
Ալեքսանդր Քանանյանը նկատում է, որ ի հեճուկս տարիներ ձգվող թատրոնի, արցախցիներն իրենց համարում են Հայաստանի մաս, եւ Սերժ Սարգսյանի այն հայտարարությունները, թե՝ իսկ ո՞վ է ասել, թե Արցախը Հայաստանի մասն է, ու Հայաստանի հետ պետք է մտներ Մաքսային միություն, արցախցիներին բավական վիրավորել է: «Վիրավորվածությունն իր անվայել եւ անկարող պահվածքից էր»,- ասաց Ալեքսանդր Քանանյանը` հավելելով, որ Սերժ Սարգսյանի վարկանիշն Արցախում նույնպես զրոյական է, բայց արցախցիներն արհեստական պատկերացում ունեն, որ չպետք է հարվածեն Երեւանում արցախյան ծագում ունեցող ուժերին, որովհետեւ ավելի վատ բաներ կարող են լինել:
Ալեքսանդր Քանանյանը նաեւ որոշ մանրամասներ պատմեց դեռ նախորդ տարի սեպտեմբերի 3-ից հետո Արցախում, Բակո Սահակյանի նախաձեռնությամբ եւ մասնակցությամբ տեղի ունեցած մի փակ հանդիպումից, որի ժամանակ ներկայացվել է քաղաքական կուրսի փոփոխությամբ պայմանավորված նոր իրավիճակը: Ալեքսանդր Քանանյանն ասաց, որ այդ հանդիպումից հետո Հայաստան-Արցախ սահմանին գոյություն ունեցող մաքսակետերում լրացուցիչ աշխուժություն է նկատվում եվ լրացուցիչ մաքսակետերի տեղադրում: Այդ հանդիպման ժամանակ Սերժ Սարգսյանը նաեւ հայտարարել է, որ Նազարբաեւը դեմ է, որպեսզի Հայաստանն ու Արցախը միասին մտնեն ՄՄ: Հետեւաբար, նա սին է համարում այն հայտարարությունները, որ Հայաստանն անտեղյակ էր Ղազախստանի դիրքորոշումից: Այլ մանրամասները` քիչ ուշ`տեսանյութում:
Կարդացեք նաև
Նելլի ԳՐԻԳՈՐՅԱՆ
