«Խաղաղապահ ուժերի տեղակայման հարցը պետք է քննարկենք»,- այսօր «Նովոստի» միջազգային մամուլի կենտրոնում կայացած «Անվտանգության արդիական մարտահրավերները ԱՊՀ տարածքում թեմայով Երեւան-Մոսկվա-Աստանա տեսակամրջի ժամանակ հայտարարեց ԱՊՀ երկրների Կովկասի ինստիտուտի բաժնի վարիչ Վլադիմիր Եվսեևը` պատասխանելով հայաստանցի լրագրողներից մեկի հարցին`ինչո՞ւ ՀԱՊԿ-ից եւ ԱՊՀ-ից արձագանքներ չեն հնչում այդ միավորումների անդամ Հայաստանի նկատմամբ Ադրբեջանի կողմից իրականացվող ագրեսիայի առնչությամբ: Խոսքը Ադրբեջանի կողմից հայկական տարածքների նկատմամբ իրականացվող դիվերսիոն գործողությունների մասին է: Վերջերս նման դրսեւորումներ եղան Տավուշի մարզի գյուղերի նկատմամբ: Հայկական կողմից նաեւ զոհեր եղան:
ՌԴ-ն պատրաստ է Հայաստանի անվտանգությունը ապահովել հարյուր տոկոսով, եթե խաղաղապահների հարցը լուծվի: Այլապես հետխորհրդային տարածքում եւ ԱՊՀ տարածքում խաղաղություն ունենալու համար, ըստ ռուսաստանցի քաղաքագետի, ոչ ոք չի կարող հավաստիացումներ տալ: «Ոչ թե փոփոխված մադրիդյան սկզբունքները պետք է քննարկել, հույս դնել Մինսկի խմբի վրա, որի վզին ԱՄՆ-ը փորձում է փաթաթել իր մոտեցումները`Ուորլիքի բերանով»,- ասաց Վլադիմիր Եվսեևը `նկատելով, որ Ուորլիքի առաջարկները կառուցողական չէին:
ԼՂՀ-ի անվտանգության մասով էլ բանախոսը նկատեց, որ սահմաններից դիպուկահարներին պետք է հանել. եթե դա չանենք, կորուստներից չենք խուսափի:
Տեսակամրջի նպատակն էր քննարկել հարցերը`ո՞ր մարտահրավերներն են այսօր առավել մեծ սպառնալիք հանդիսանում ԱՊՀ երկրների անվտանգության համար։ Միջին Ասիայի և Մեծ Կովկասի տարածաշրջաններում ինչպե՞ս նվազագույնի հասցնել արտաքին գործոնների հասցրած վնասը։ ԱՊՀ երկրներն ի՞նչ քայլեր պետք է ձեռնարկեն, որպեսզի թուլացնեն Ուկրաինայի տարածքում տիրող վիճակը, որը քաղաքացիական պատերազմի է վերածվել, իսկ Դոնեցկի և Լուգանսկի մարզերում մարդասիրական աղետ է սկսվել:
Իսկ Աստանայում` քաղաքական գիտությունների դոկտոր, պրոֆեսոր Սերգեյ Ֆեդոսեևը`պատասխանելով հայաստանցի լրագրողների`Ղազախստանի դիրքորոշմանը վերաբերվող հար
ցին, ասաց, որ իր երկիրը բազմավեկտոր քաղաքականություն է տանում, տոլերանտ են, Ղազախստանում մեծ հայկական համայնք կա: Լրագրողի հարցը վերաբերվում էր Եվրասիական տնտեսական միությանը եւ Մաքսային միությանը Հայաստանի անդամակցության մասով Ղազախստանի կոշտ, պրոիսլամական դիրքորոշմանը:
Կարդացեք նաև
Քաղաքագետն ասաց, որ բացի Ղարաբաղի հարցի վերապահումից, ինքն այլ «միջադեպ» չի տեսել, բայց դրանից հետո ինքը լսել է Հայաստանի նախագահի ելույթը. «Նա համոզված հայտարարեց, որ այդ հարցը հանված է եւ մինչեւ տարեվերջ Հայաստանը կստորագրի այդ փաստաթղթերը»:
Նելլի ԳՐԻԳՈՐՅԱՆ
