Ինչպես արդեն տեղեկացրել ենք, ՀՀ սահմանադրական բարեփոխումների հայեցակարգին նվիրված հանրային քննարկումների մարզային փուլում քննարկումներ են տեղի ունեցել Աշտարակ և Արտաշատ քաղաքներում:
Արտաշատում ԱԺ աշխատակազմի ղեկավար, ՀՀ Նախագահին կից սահմանադրական բարեփոխումների մասնագիտական հանձնաժողովի անդամ Հրայր Թովմասյանը վստահեցրեց, որ սահմանադրական բարեփոխումների հարյուր տոկոս անհրաժեշտություն կա:
Ի հակադրումն այս պնդման` Aravot.am-ի հարցումը արտաշատցիներից շրջանում ցույց տվեց, որ նրանցից շատերը կողմ չեն սահմանադրական բարեփոխումներին, կամ ընդհանրապես չեն էլ պատկերացնում` դա ինչ է: Նրանցից մեկը սահմանադրական բարեփոխումների հարցը շփոթեց կուտակային կենսաթոշակային օրենքի հետ ու վրդովված նշեց, թե «դա խաբեություն է, մեր էրեխեքը ումի՞ց են այդ փողերը ստանալու»:
Թեև համեմատության մեջ քիչ, բայց «կողմ» արտահայտվողներ էլ եղան, բայց չկարողացան պատճառաբանել, թե ինչու են «կողմ»: Նրանցից մեկի պատասխանն էր յուրօրինակ. «Ես հարգում եմ օրենքը և աղոթում նրանց համար, Աստված նրանց նշանակել է»: Մեր հարցին` ի՞նչ է նշանակում Աստված իրենց նշանակել է, մի՞թե ժողովուրդը չի ընտրում իշխանությանը, մեզ հետ զրուցած արտաշատցի միջին տարիքի տղամարդը նշեց. «Ժողովուրդը ընտրել է, բայց գրված է` աղոթեք բոլոր թագավորների համար, իսկ մենք պիտի հնազանդվենք»:
Կարդացեք նաև
«Դեմ» արտահայտված քաղաքացիները ոչ մի հույս չեին կապում խորհրդարանական համակարգի հետ: Արտաշատցի մի կին այս առիթով ասաց. «Եթե հանուն ժողովրդի են անելու, թող անեն: Բայց եթե մարդիկ այնտեղ նստել, այդ բոլոր հարցերը մտածել, որոշելու ու կատարել են ուզում ու եթե իրենց գաղափարը չի հերքում, թող ժողովրդին հարցնեն: Ամուր, խելացի, ժողովրդի, ոչ թե իրենց աթոռի համար մտածող ղեկավարներ պիտի լինեն: Եթե գոնե քսան տոկոս ժողովրդի համար մտածեն, բոլոր հայերը կհավաքվեն Հայաստանում»:
Մի երիտասարդ կին էլ ասաց. «Ի՞նչ տարբերություն, եթե երկիրը նույնը պիտի մնա, պաշտոնավորը փոխվի, ոչ մի նշանակություն չունի: Խորհրդարանական լինի, թե` չլինի, նույն բանն է: Եթե ժողովրդի մասին են մտածելու, թող հիմա մտածեն, եթե չեն մտածելու, հետո էլ չեն մտածի, տարբերություն չկա»:
Մանրամասները` տեսանյութում:
Տաթև ՀԱՐՈՒԹՅՈՒՆՅԱՆ
